Xotinini oʻz joniga qasd qilish darajasiga yetkazganlikda ayblanayotgan sobiq probatsiya inspektorining ishi sudda koʻrib chiqiladi
Samarqand viloyatida probatsiya sobiq inspektori xotinini oʻz joniga qasd qilish darajasiga yetkazishda va oʻldirish bilan qoʻrqitishda ayblanmoqda. Nemolchi.uz maʼlumotlariga koʻra, ayol bir necha bor ichki ishlar organlariga murojaat qilgan, biroq eriga faqat hayfsan berilgan, tuman IIB rahbariyati esa er-xotinni yarashtirishga undagan.
Ayolini oʻz joniga qasd qilish darajasiga yetkazganlikda ayblanayotgan probatsiya sobiq inspektorining ishi sudga oshiriladi
Samarqand viloyati Oqdaryo tumani IIB sobiq probatsiya inspektori Behzod Olimovga nisbatan qoʻzgʻatilgan jinoyat ishi sudga kelib tushdi. Bu haqda Oʻzbekistondagi zoʻravonlikka qarshi Nemolchi.uz loyihasi ayblov xulosasiga tayanib xabar berdi.
Behzod Olimovga Oʻzbekiston Jinoyat kodeksining 103-moddasi 2-qismi «a» bandi (Aybdorga moddiy tomondan yoki boshqa jihatdan qaram boʻlgan shaxsni oʻz joniga qasd qilish yoki oʻz joniga qasd qilishiga urinish darajasiga yetkazish), shuningdek, 112-moddasi 1-qismi (Oʻldirish yoki zoʻrlik ishlatish bilan qoʻrqitish) boʻyicha ayb qoʻyilmoqda.
Ushbu moddalarning birinchisi boʻyicha 7 yildan 10 yilgacha ozodlikdan mahrum qilish jazosi nazarda tutilgan.
Tergov talqiniga koʻra, Olimov turmush oʻrtogʻini muntazam ravishda kaltaklab, ustidan masxara qilgan va bir necha bor oʻldirish bilan tahdid qilgan. Tergov ayolning 2026 yil 6 maydan 7 mayga oʻtar kechasi oʻz joniga qasd qilishga urinishini aynan erining shafqatsiz muomalasi bilan bogʻlaydi. Sud-tibbiy ekspertizasi u olgan jarohatlarni hayot uchun xavfli boʻlgan ogʻir tan jarohatlari toifasiga kiritdi.
Nemolchi.uz mualliflari Olimov aybini tan olmagani va xizmat quroli bilan tahdid qilganini rad etayotganini qayd etdi.
Nemolchi.uz xabariga koʻra, ayblov xulosasida ichki ishlar organlariga maʼlum boʻlgan zoʻravonlik va tahdidlarning oldingi epizodlari ham tavsiflangan.
Xususan, jabrlanuvchining koʻrgazmalariga koʻra, 2026 yil 15 fevralda eri unga xizmat toʻponchasi bilan tahdid qilib: «Hozir peshonangga otaman», degan. Qurol bilan tahdid qilingani haqida 102 raqamiga murojaat qilgan uning otasi ham tergovga aytib bergan.
Ayolning soʻzlariga koʻra, shundan soʻng tuman IIB boshligʻi Alisher Ibodov uni va otasini oilani saqlab qolish uchun Olimovni kechirishga koʻndirgan va vaziyatni nazoratga olishga vaʼda bergan. Jabrlanuvchining otasi ham tergovga IIB boshligʻi va uning oʻrinbosarlari profilaktik suhbatlar oʻtkazish va yangi janjallarning oldini olishga vaʼda berganini maʼlum qilgan.
Ibodovning koʻrgazmalariga koʻra, u er-xotinni yarashtirgan va oilaga yordam berishga vaʼda bergan.
«Va bularning barchasi — ayolga nisbatan zoʻravonlik va tahdidlarning koʻplab faktlariga qaramay. Aslida, oilani uning sogʻligʻi va hayoti evaziga saqlab qolishga harakat qilishgan», — deb taʼkidladi Nemolchi.uz.
Ayolning 2025—2026 yillardagi koʻplab murojaatlari haqida tergovga tuman IIB boshligʻining jamoat xavfsizligi xizmati boʻyicha oʻrinbosari Sanjar Iboyev ham aytib bergan. Uning soʻzlariga koʻra, murojaatlar boʻyicha xizmat tekshiruvlari oʻtkazilgan, Olimovga esa intizomiy jazo choralari qoʻllanilgan.
2025 yil yanvar oyidagi kaltaklashdan soʻng, jabrlanuvchining taʼkidlashicha, taxminan oʻsha yilning fevral oyida eri hayfsan olgan. Yana bir hayfsan unga 2026 yil 6 martda — ayolning koʻrgazmalariga koʻra, u toʻponcha bilan tahdid qilgan fevral epizodidan soʻng eʼlon qilingan.
Nemolchi.uz maʼlumotlariga koʻra, Olimov ayolining oʻz joniga qasd qilishga urinishidan deyarli ikki oy oʻtib — 4 iyul kuni qamoqqa olingan. Loyiha sodir boʻlgan voqea haqida may oyida hikoya qilgan edi.
Nemolchi.uz Olimovni qamoqqa olish muddatlari va nega ayolning oldingi murojaatlari, jumladan xizmat quroli bilan tahdid qilingani haqidagi xabar unga himoyani taʼminlamagani yuzasidan savollarni oʻrtaga tashladi. Loyiha, shuningdek, zoʻravonlik va tahdidlar haqida bilgan IIB rahbarlarining harakatlariga baho berishga chaqirdi.
«Mamlakatda zoʻravonlikka toqatsizlik va ayollarni himoya qilish haqida koʻp gapirilmoqda. Biroq soʻzlar IIB arizadan soʻng koʻradigan harakatlar bilan tasdiqlanishi kerak. Xizmatchisi tomonidan zoʻravonlik haqidagi xabarlarga javoban ayolni yarashishga koʻndirishsa, u esa xizmatni davom ettiraversa, huquqni muhofaza qilish organlariga qanday ishonish mumkin? Tizim jabrlanganlarni himoya qilishi va aybdorlarning — jumladan pogon taqqanlarning javobgarligiga erishishi kerak. IIB rahbariyati uchun qaysi biri muhimroq: ayolni himoya qilishmi yoki tizimda agressiv xodimni saqlab qolishmi?» — deya savol berdi loyiha mualliflari.