Xitoyda rekordchi temiryoʻl-avtomobil koʻprigi qurilmoqda
Xitoyning Chjetszyan provinsiyasida qurilayotgan Sixoumen temiryoʻl-avtomobil koʻprigida ilk yoʻnaltiruvchi tros boʻgʻoz ustidan dron yordamida tortildi. Umumiy uzunligi 3 118 metr boʻladigan inshoot asosiy oraligʻi boʻyicha dunyodagi eng yirik temiryoʻl-avtomobil koʻprigi boʻlishi kutilmoqda.
Xitoyda rekord o‘rnatishi kutilayotgan temiryo‘l-avtomobil ko‘prigi bunyod etilmoqda
Naked Science nashrining xabar berishicha, og‘ir yuk ko‘taruvchi dron 5-raqamli tayanch minora tepasidan uchib chiqib, diametri 2,5 millimetr va uzunligi 1 700 metr bo‘lgan trosni olib o‘tgan. Tros yuqori mustahkamlikka ega Dyneema tolasidan tayyorlangan.
Dron kemalar gavjum bo‘lgan bo‘g‘ozni 10 daqiqada kesib o‘tib, trosni 4-raqamli tayanch minoradagi belgilangan nuqtaga yetkazgan. Shu tariqa Sezi va Szintan orollari qirg‘oqlaridagi ikki asosiy tayanch bir-biriga ulangan.
Bu esa ko‘prik qurilishi uchun zarur bo‘lgan osma ish yo‘lakchasini o‘rnatishni boshlash imkonini beradi. Keyinchalik aynan shu yo‘lakcha orqali ko‘prikning yuqori konstruksiyalari montaj qilinadi.
Sixoumen ko‘prigining asosiy qismi vantali va osma konstruksiyalarni uyg‘unlashtirgan usulda quriladi. Asosiy oraliq 1 488 metrni, ko‘prik qatnov qismining kengligi esa 68 metrni tashkil etadi.
Manbaga ko‘ra, qurilish tugagach, u dengiz ustidan qurilgan dunyodagi eng keng ko‘prik bo‘lishi kutilmoqda. Shuningdek, inshoot vantali va osma tizimlar birlashtirilgan ko‘priklar orasida ham rekord o‘rnatishi rejalashtirilgan.
Loyiha temiryo‘l-avtomobil ko‘priklari orasida eng katta asosiy oraliq, eng katta kenglik va eng baland asosiy tayanch minoralar kabi ko‘rsatkichlar bo‘yicha jahon rekordlariga da’vogarlik qilmoqda. Qoyaga mahkamlanadigan anker tizimi va burg‘ilab quyiladigan qoziqlar asosidagi poydevor o‘lchamlari ham rekord darajada bo‘lishi ko‘zda tutilgan.
Yo‘naltiruvchi tros keyingi tortish arqonlari va montaj elementlarini ko‘prik oralig‘idan o‘tkazish uchun xizmat qiladi. Bunday ishlarda vertolyot, kema yoki dronlardan foydalanish mumkin.
Sixoumen akvatoriyasida kuchli shamol, baland to‘lqinlar va intensiv kema qatnovi qurilishni murakkablashtiradi. Shu sababli Ningbo-Zhoushan Railway va China Railway Major Bridge Engineering Group mutaxassislari turli usullarni solishtirib, drondan foydalanishni tanlagan.
Bu usul tayyorgarlik va havodagi ishlar vaqtini qisqartirib, xalqaro kema qatnovi yo‘lida harakatni cheklash muddatini kamaytirish imkonini bergan.