Xitoyda 110 robotdan iborat raqs guruhi Ginness rekordini örnatdi
Xitoyning AGIBOT kompaniyasi yaratgan 110 ta odamsimon robot bir vaqtda sinxron raqs ijro etib, Ginness rekordini örnatdi. Robotlar sakrab, turli şakllarda saf tortib, hatto «2026» yozuvini hosil qilgan paytda ham harakatlar uyğunligini saqlab qoldi.
Xitoyda 110 ta robotdan tuzilgan raqs jamoasi Ginness rekordini o‘rnatdi
Namoyish 24-oktabr kuni Xitoyning Shandun provinsiyasidagi Szinan shahrida bo‘lib o‘tdi. «Xuanxe» xalqaro anjumanlar va ko‘rgazmalar markazidagi chiqishda Expedition A3 modeliga mansub 110 ta odamsimon robot qatnashdi.
Odam bo‘yiga yaqin o‘lchamdagi robotlar safda harakatlanib, sakrab va joylarini almashtirib, murakkab raqs dasturini bajardi. Ular to‘lqinsimon harakatlarni namoyish etdi va bir necha bor turli shakllarda qayta saflandi.
Chiqish davomida robotlar «2026» ko‘rinishida ham joylashdi. Raqsning bir qismidan ikkinchisiga o‘tishda butun guruh harakatlarni bir-biriga muvofiq bajarishda davom etdi.
Tadbirda Ginness rekordlar kitobi vakili ishtirok etib, qatnashgan robotlar sonini tekshirdi va rasmiy sertifikatni topshirdi. Natija bir vaqtda raqs tushgan odamsimon robotlar soni bo‘yicha rekord sifatida qayd etildi.
Robotlarning harakatlarini muvofiqlashtirish uchun AGIBOT o‘zining LinkBots platformasidan foydalangan. U ko‘plab robotlarning vazifalari va harakatlarini guruh sifatida rejalashtirish hamda boshqarishga mo‘ljallangan. Shu orqali har bir apparatning harakati umumiy raqs dasturiga moslashtirilgan.
Kompaniya maʼlumotiga ko‘ra, namoyishda qatnashgan 110 ta robotning barchasi seriyali ishlab chiqarilgan modellar bo‘lgan. Ular aynan ushbu chiqish uchun maxsus qayta jihozlanmagan. Bu AGIBOT tijoriy ravishda ishlab chiqarayotgan robotlarini katta guruh tarkibida muvofiqlashtira olganini ko‘rsatadi.
Namoyish ko‘p sonli odamsimon robotlarni murakkab umumiy dastur asosida boshqarish imkoniyatini ochib berdi. Bunda aloqa tizimlari va markazlashgan boshqaruv muhim o‘rin tutgan.
Shu bilan birga, sinxron raqs nazorat qilinadigan sharoitdagi namoyish hisoblanadi. U robotlar zavodlarda yoki boshqa real ish muhitida ham murakkab vazifalarni xuddi shunday ishonchli bajara olishini o‘z-o‘zidan isbotlamaydi.