Umarali Rahmonaliyev oʻynayotgan «Sabax» Chempionlar ligasidagi ilk gʻalabasini qoʻlga kiritdi
Oʻzbekiston terma jamoasi yarim himoyachisi Umarali Rahmonaliyev toʻp suradigan Ozarbayjonning «Sabax» klubi UYEFA Chempionlar ligasi asosiy bosqichining ikkinchi turida Praganing «Slaviya» jamoasini 2:0 hisobida magʻlub etdi. Boku klubi uchun bu turnirning asosiy bosqichidagi ilk gʻalaba boʻldi.
Umarali Rahmonaliyev oʻynayotgan «Sabax» Chempionlar ligasidagi ilk gʻalabasini qoʻlga kiritdi
Ozarbayjonning «Sabax» futbol klubi UYEFA Chempionlar ligasi asosiy bosqichining ikkinchi turida Chexiyaning «Slaviya» klubini 2:0 hisobida magʻlub etdi.
Oʻzbekiston terma jamoasi yarim himoyachisi Umarali Rahmonaliyev Ozarbayjon jamoasi tarkibida maydonga tushdi.
Birinchi boʻlimda mezbonlar toʻpni toʻrga yoʻllashdi, ammo Kaxim Perrisning goli VAR koʻruvidan soʻng ofsayd sababli bekor qilindi.
«Slaviya» ham bir nechta xavfli vaziyatlarni yuzaga keltirdi, ammo «Sabax» darvozaboni Stas Pokatilov oʻz darvozasi daxlsizligini saqlab qoldi. Jamoalar tanaffusga 0:0 hisobida yoʻl olishdi.
49-daqiqada «Sabax» hisobni ochdi. Xorvatiyalik yarim himoyachi Xrvoye Lepinitsa chap qanotdan uzatma berdi, shundan soʻng Perris darvozani ishgʻol qildi.
Uchrashuv yakunida, 88-daqiqada Joy-Lans Mikels mezbonlarning ustunligini oshirdi. «Slaviya» darvozaboni Markovich jarima maydonchasidan tashqariga muvaffaqiyatsiz chiqqanidan soʻng, «Sabax» futbolchisi toʻpni egallab oldi va uzoq masofadan boʻsh darvozaga zarba yoʻllab gol urdi.
ESPN maʼlumotlariga koʻra, Oʻzbekiston terma jamoasi yarim himoyachisi Umarali Rahmonaliyev Praganing «Slaviya» klubiga qarshi oʻyinda (2:0) toʻpga 58 marta tegindi, ikkita zarba yoʻlladi, ikkalasi ham darvoza sohasiga aniq bordi. Kutilayotgan gollar (xG) koʻrsatkichi 0,29 ni, kutilayotgan golli uzatmalar (xA) esa 0,47 ni tashkil etdi.
Bundan tashqari, oʻzbekistonlik futbolchi beshta toʻpni olib qoʻyishni amalga oshirdi va sakkizta yakkakurashda ishtirok etdi. U samarali harakatlar — gollar va golli uzatmalar bilan ajralib turmadi.
13 oktyabr kuni 2026/2027 yilgi mavsum UYEFA Chempionlar ligasi asosiy bosqichi ikkinchi turining yana sakkizta oʻyini boʻlib oʻtdi.
Ikkinchi turning qolgan toʻqqizta uchrashuvi 14 oktyabrga belgilangan.
Eslatib oʻtamiz, «Sabax» 2026 yilning avgustida toʻrtta kvalifikatsiya raundidan oʻtib, ilk bor Chempionlar ligasining asosiy bosqichiga yoʻl olgan edi.
Kvalifikatsiya pley-off bosqichining javob oʻyinida Ozarbayjon klubi Izrailning «Apoel» jamoasini 5:2 hisobida, ikki oʻyin natijasiga koʻra esa 6:4 hisobida magʻlub etdi. Rahmonaliyev javob oʻyinida «Sabax» gollaridan biriga mualliflik qildi.
Yarim himoyachi 2025 yilning yanvaridan beri «Sabax»da oʻynab kelmoqda. Avvaliga u Qozonning «Rubin» klubidan ijara huquqi asosida oʻtdi, 2026 yilning yanvarida esa transfer toʻliq amalga oshirildi.
Chempionlar ligasi asosiy bosqichining birinchi turida «Sabax» Angliyaning «Manchester Yunayted» klubiga imkoniyatni boy berib qoʻygandi.
Ozarbayjon klubi turnirdagi navbatdagi oʻyinini 20 oktyabr kuni Dortmundning «Borussiya»siga qarshi oʻtkazadi.