Umarali Rahmonaliyev jamoasi YCHL bahslarini Ozarbayjondagi eng katta stadionda o‘tkazishi mumkin
Umarali Rahmonaliyev jamoasi YCHL o‘yinlarini Ozarbayjondagi eng katta stadionda o‘tkazishi mumkin
Yevropa Chempionlar Ligasining umumiy guruh bosqichiga yo‘l olgan Ozarbayjonning “Sabah” klubi uy uchrashuvlarini Boku Olimpiya stadionida o‘tkazishi ehtimoli bor. Bu haqda klub matbuot xizmati rahbari Elnur Hamidov Offside Plus nashriga bergan intervyusida ma’lum qildi.
“Stadion masalasi bo‘yicha hozircha aniq yangilik yo‘q. Ayni paytda biz Tofiq Bahromov nomidagi Respublika stadioniga buyurtma berganmiz. Biroq boshqa variantlar ham ko‘rib chiqilmoqda. Bu borada yangilik bo‘lsa, jamoatchilikka batafsil ma’lumot beriladi”, dedi Hamidov.
Shu tariqa, Boku Olimpiya stadioni ham “Sabah”ning Chempionlar Ligasidagi uy uchrashuvlari uchun ehtimoliy variantlardan biri sifatida ko‘rilmoqda. Bu borada muzokaralar davom etmoqda.
Ma’lumot uchun, Ozarbayjonning “Sabah” klubida O‘zbekiston milliy terma jamoasi yarimhimoyachisi Umarali Rahmonaliyev faoliyat yuritadi. Jamoa ilk bor YCHLda ishtirok etmoqda. Qur’a natijalariga ko‘ra, “boyqushlar” guruh bosqichida “Arsenal”, “Barselona”, “Borussiya Dortmund”, “Manchester Yunayted” va “Napoli” kabi kuchli jamoalarga qarshi to‘qnash keladi.
Ozarbayjonliklar liga bosqichining birinchi turida “Old Trafford” stadionida “qizil iblislar”ga qarshi bahs olib boradi.
Musobaqaning birinchi tur o‘yinlari 8–10-sentyabr kunlariga belgilangan.