Ukraina Starlink yordamida Rossiyaga zarba berishi mumkin — FT
Ukraina Starlink yordamida Rossiyaga zarba berishi mumkin — FT
Ilon Mask Ukrainaga Starlink bilan jihozlangan dronlardan Rossiya hududidagi harbiy nishonlarga zarba berish uchun foydalanishga ruxsat berishga tayyorligini bildirgan, ammo yakuniy qarorni AQSH Oq uyi qabul qilishi kerak. Bu haqda Financial Times xabar berdi.
Nashr ma’lumotlariga ko‘ra, Ukraina prezidenti Vladimir Zelenskiy Ilon Maskdan Starlink bilan jihozlangan dronlarni Ukraina chegarasidan 200 kilometrgacha uzoqlikdagi Rossiyaning ballistik raketa uchirish qurilmalariga qarshi qo‘llashga ruxsat berishni so‘ragan.
Masaladan xabardor manbalarning aytishicha, Mask avvalroq Ukrainaning sobiq mudofaa vaziri Mixail Fedorovga Starlink o‘rnatilgan dronlardan Ukraina hududidan tashqarida Rossiya nishonlarini yo‘q qilish uchun foydalanishga ruxsat berishga tayyorligini bildirgan. Biroq Mask bu qaror siyosiy xususiyatga ega ekanini va uni Oq uy qabul qilishi kerakligini aytgan.
Ukraina uchun bunday imkoniyat ballistik raketalarga qarshi kurashda yangi vositaga aylanishi mumkin. Bunday holatda Ukraina Rossiya raketasi uchirilishini kutib, uni havoda urib tushirish o‘rniga, Rossiya hududidagi raketa uchirish qurilmalarini aniqlab, oldindan yo‘q qilish imkoniga ega bo‘ladi.
Ukrainaning Fire Point mudofaa kompaniyasi hammuassisi va bosh konstruktori Denis Shtilerman avvalroq Starlink tizimini uzoq masofali zarbdor qurollarga integratsiya qilish Rossiya hududining ichkarisidagi harakatlanuvchi nishonlarga qarshi samaraliroq kurashish imkonini berishini aytgan. “Biz o‘qlarni urib tushirish o‘rniga, kamonchilarni nishonga olamiz”, deya tushuntirgan Shtilerman bunday yondashuv mohiyatini.
Ukraina hozirda Rossiyaning raketa uchirish qurilmalariga zarba berish uchun Maskning Starlink tizimidan foydalanishga ruxsat olishga urinmoqda. FT ma’lumotlariga ko‘ra, AQSH prezidenti Donald Tramp esa bu rejani qo‘llab-quvvatlashga moyil ekanini namoyish etmagan.
Avvalroq, Ukrainaga qurol-yarog‘ yetkazib beruvchi Britaniya mudofaa kompaniya rahbarlari Rossiya josuslari nishoniga aylanishi mumkinligi haqida ogohlantirilgan edi. Britaniya hukumatining yuqori martabali amaldorlari yoz boshida mudofaa kompaniya rahbarlari bilan o‘tkazgan davra suhbatida ularga va xodimlariga nisbatan Kreml tomonidan yuzaga kelayotgan tahdid kuchaygani haqida ma’lumot bergan.