“Ukraina o‘z ballistik raketasini yaratmoqda”: Zelenskiy yangi qurollar haqida ma’lumot berdi

**"Ukraina o'z ballistik raketasini yaratmoqda": Zelenskiy yangi qurollar haqida ma'lumot berdi**

Ukraina havo hujumidan mudofaa va ballistik raketalarga qarshi mudofaa imkoniyatlarini oshirish maqsadida bir qator muzokaralar olib bormoqda. Bu jarayon Fransiya bilan SAMP/T tizimlari va FREYJA loyihasidan tortib, Germaniya bilan PAC-2 raketalarini yetkazib berish bo'yicha kelishuvgacha bo'lgan yo'nalishlarni qamrab oladi. Bu haqda Ukraina prezidenti Vladimir Zelenskiy jurnalistlar bilan uchrashuvda ma'lum qildi.

Zelenskiyning so'zlariga ko'ra, u Fransiya prezidenti Emmanuel Makron bilan qariyb ikki soat davom etgan suhbatda muzokaralardan tortib, SAMP/T havo mudofaa tizimlarigacha bo'lgan bir qator masalalarni muhokama qilgan.

Ukraina kuzda Fransiyadan yangi havo mudofaasi radarlarini, shuningdek, bitta SAMP/T tizimini olishni rejalashtirgan. Ishlab chiqarish imkoniyatlariga qarab, yana bir tizim yetkazib berilishi mumkin.

Amaldagi shartnomaga ko'ra, Ukraina ushbu raketalar uchun to'lovni Yevropa krediti hisobidan amalga oshirishi mumkin. Shuningdek, sentyabr oyida qo'shimcha raketalarni ishlab chiqarish bo'yicha shartnomalar imzolanishi rejalashtirilmoqda.

Zelenskiy yil oxirigacha Fransiyaning uch turdagi qurolini Ukrainada ishlab chiqarish uchun litsenziyalar olishga umid qilayotganini bildirdi.

Patriot tizimlari bo'yicha esa Ukraina Germaniya kansleri Fridrix Merts bilan 2027-2028-yillarda 600 ta PAC-2 raketasini yetkazib berish masalasida kelishib olgan.

Shuningdek, Kiyev AQSh bilan ham muzokaralarni davom ettirmoqda. Zelenskiyning aytishicha, AQSh 2027-yilning ikkinchi yarmida raketalar ishlab chiqarish hajmini sezilarli darajada oshirishi kutilmoqda.

Yevropaning FREYJA loyihasi ham rivojlanmoqda. Zelenskiyning ta'kidlashicha, loyiha endi siyosiy darajadagi qo'llab-quvvatlash bosqichidan kompaniyalar o'rtasidagi texnik ishlar bosqichiga o'tgan.

Bundan tashqari, Ukraina Raytheon kompaniyasi bilan Patriot tizimi uchun raketa yaratish bo'yicha hamkorlik qilmoqda. Kompaniya ushbu loyiha uchun Fire Point kompaniyasini hamkor sifatida tanlagan. Dastlabki texnik uchrashuv o'tkazilgan va yaqin haftalarda javob olinishi kutilmoqda.

**Ukraina o'z ballistik qurolini yaratmoqda**

Zelenskiy, shuningdek, ikki ukrainalik kompaniya mahalliy ballistik qurol yaratish ustida ishlayotganini ma'lum qildi.

Hozircha qurolni ommaviy ishlab chiqarish boshlangan emas. Uning so'zlariga ko'ra, kompaniyalar ayrim texnik qiyinchiliklarga duch kelmoqda, biroq ularni hal qilish ustida ishlayapti.

Zelenskiy aynan ommaviy ishlab chiqarish boshlanganidan keyingina Ukraina Rossiyaning hujumlariga javoban sezilarli zarbalar bera olishini ta'kidladi.

**Ukraina Starlink'ning muqobilini ham ishlab chiqmoqda**

Ukraina prezidenti Rossiya Xitoy bilan hamkorlikda Starlink'ning o'z analogini yaratish ustida ishlayotganini va loyiha 2026-yil dekabrigacha yakunlanishi rejalashtirilganini aytdi.

Shu sababli Ukraina ham Yevropadagi davlatlardan biri bilan birgalikda shunga o'xshash loyiha ustida ishlamoqda. Zelenskiyning ma'lum qilishicha, loyiha bo'yicha dastlabki sinovlar allaqachon boshlangan.

Rossiya tashqi ishlar vaziri o'rinbosari Sergey Ryabkov Moskva Ukraina bo'yicha yangi takliflarni ko'rib chiqishga tayyorligini ma'lum qilgan edi.