Ukraina AQSh muzokarachilariga urushni tugatish bo‘yicha takliflar taqdim etdi – Zelenskiy
Ukraina rahbari so‘zlariga ko‘ra, rossiyaliklar kuzda, parlament saylovidan keyin safarbarlik e’lon qilishga tayyorgarlik ko‘rmoqda.
Ukraina Prezidenti Volodimir Zelenskiyning so‘zlariga ko‘ra, Ukraina AQSh muzokarachilariga Rossiya bilan urushni yakunlash bo‘yicha o‘z takliflarini taqdim etgan. Shuningdek, u Rossiya kelgusi oyda bo‘lib o‘tadigan parlament saylovlarini yangi safarbarlik e’lon qilish uchun bahona sifatida ishlatishini taxmin qildi. Bu haqda u kechki videomurojaatida ma’lum qildi.
Davlat rahbari shunday dedi: "Biz o‘z takliflarimizni Amerika tomoniga topshirdik. Qo‘shma Shtatlar mudofaamizni, ayniqsa havo hujumidan mudofaa sohasida mustahkamlashga yordam berishi hamda Rossiyaga urushni davom ettirishga emas, balki uni tugatishga tayyorgarlik ko‘rish uchun o‘z rejalarini o‘zgartirishga majburlash maqsadida bosim o‘tkazishi mumkin."
Zelenskiyning ta’kidlashicha, Ukraina razvedkasida Rossiya jangovar tarkibni to‘ldirish maqsadida sentyabr oyidagi saylovdan yangi safarbarlik e’lon qilish uchun foydalanishiga oid dalillar mavjud.
"Ular kuzda, parlament saylovi sahnalashtirilishi bilanoq, safarbarlikka tayyorgarlik ko‘rmoqda. So‘ngra, "saylov" deb ataluvchi tadbirdan keyin u (Putin) yil oxirigacha qo‘shimcha bir necha yuz ming rossiyalikni, kelasi yili esa yana shunchasini tezkor safarbar qilishni rejalashtirmoqda," dedi Zelenskiy. U bu "go‘yoki rossiyaliklar urushni qo‘llab-quvvatlayotgandek tasavvur uyg‘otish" rejasining bir qismi ekanini qayd etdi.