Zelenskiy Ilon Maskni “Ozodlik” ordeni bilan taqdirladi
Vladimir Zelenskiy Ilon Maskni Ukrainaning oliy davlat mukofotlaridan biri — 'Ozodlik' ordeni bilan taqdirladi. OAVga ko‘ra, shu kunlarda Ukraina rasmiylari Maskni Ukraina Qurolli kuchlariga Rossiya hududidagi nishonlarni mo‘ljalga olishda Starlink`dan foydalanishga ruxsat berishga ko‘ndirishga urinmoqda.
Zelenskiy Ilon Maskni "Ozodlik" ordeni bilan mukofotladi
Ukraina prezidenti Vladimir Zelenskiy SpaceX va Tesla kompaniyalarining rahbari, amerikalik tadbirkor Ilon Maskni "Ozodlik" ordeni bilan taqdirlash haqidagi farmonni imzoladi. Ushbu hujjat Ukraina prezidentining rasmiy veb-saytida e'lon qilindi.
Farmonga ko'ra, Mask "insonlar hayoti va erkinligini himoya qilishdagi ulkan shaxsiy xizmatlari hamda Ukraina va Amerika Qo'shma Shtatlari xalqlari o'rtasidagi munosabatlarni rivojlantirishga qo'shgan hissasi uchun" mukofotlangan.
Politico nashrining yozishicha, bu qaror Kiyevning Maskni Starlink tarmog'idan foydalanish imkoniyatlarini kengaytirishga ko'ndirishga qaratilgan sa'y-harakatlari fonida qabul qilingan.
"Ozodlik" ordeni 2008-yilda ta'sis etilgan Ukrainaning eng yuqori davlat mukofotlaridan biri hisoblanadi. Undan faqat "Ukraina Qahramoni" unvoni va keng ko'lamli urush boshlanganidan keyin ta'sis etilgan Jangovar xizmatlari uchun xochi yuqori turadi. Bu orden bilan Ukraina fuqarolari va xorijliklar mamlakat suvereniteti va mustaqilligini mustahkamlash, demokratiyani rivojlantirish, islohotlarni amalga oshirish, shuningdek, inson huquq va erkinliklarini himoya qilishdagi alohida xizmatlari uchun taqdirlanadi.
Ordenning taniqli sohiblari orasida Ukrainaning sobiq prezidenti Leonid Kravchuk, Germaniyaning sobiq kansleri Angela Merkel, Fransiya prezidenti Emmanuel Makron, Buyuk Britaniya bosh vaziri Endi Byornhem, sobiq bosh vazir Boris Jonson, Litva prezidenti Gitanas Nauseda, Fransiyaning sobiq prezidenti Fransua Olland va AQShning sobiq prezidenti Jo Bayden bor.
Maskning Starlink sun'iy yo'ldosh internet xizmati Rossiyaning 2022-yildagi keng ko'lamli bosqini boshlanganidan buyon Ukraina kuchlariga aloqani saqlab turish va harbiy harakatlarni muvofiqlashtirishda yordam berib kelmoqda. 2026-yil fevral oyida SpaceX Rossiya kuchlari tomonidan foydalanilgan minglab Starlink terminallarini o'chirib qo'yib, ularning harbiy imkoniyatlarini zaiflashtirgandi.
Hozirda Ukraina texnologiya magnatini o'z armiyasiga Rossiya hududi ichkarisida ham Starlink tarmog'idan foydalanishga ruxsat berishiga ko'ndirishga harakat qilmoqda. Bu Ukrainaga Rossiya hududining ichkarisiga beriladigan raketa va dron zarbalarining aniqligini oshirish imkonini beradi.
"Hozircha Mask bu qaror eskalatsiyani oshiradi deb hisoblamoqda. Ammo u ko'proq dalillarni ko'rgach, o'z fikrini o'zgartirishi mumkin", — dedi Zelenskiy o'tgan shanba kuni jurnalistlarga (Politico iqtibosi).