Uelsda ulkan kit dron kamerasiga tushdi
Uelsda yashovchi havaskor baliqchi Ris Morgan Kelt dengizida finval - dunyodagi ikkinchi eng yirik kit turining oziqlanishini dron yordamida tasvirga oldi. Mutaxassis bu uchrashuvni «kamyob va omadli holat» deb baholadi.
Uelsda ulkan kit dron kamerasiga tushib qoldi
Morgan neftni qayta ishlash zavodida ishlaydi, bo‘sh vaqtida esa baliq ovlash bilan shug‘ullanadi. Uning droni dengiz yuzasiga ko‘tarilib, ozuqa olayotgan finvalni yaqindan kuzatish imkonini bergan.
Finvallar oziqlanish vaqtida tomog‘idagi cho‘ziluvchan teri burmalaridan foydalanadi. Bu ularga mayda qisqichbaqasimonlar — kril bilan birga juda katta miqdordagi suvni og‘ziga olish imkonini beradi. Bir marta og‘iz ochishda bu hajm taxminan 68 ming litrga yetishi mumkin.
Bu kitlarning uzunligi 23,8 metrdan oshishi, vazni esa 70 tonnaga yetishi mumkin. Shu sababli hatto dengiz yuzasidagi qisqa harakat ham dron tasvirlarida hayvonning ulkanligini yaqqol ko‘rsatadi.
Bangor universitetida yirik dengiz yirtqichlari ekologiyasidan dars beruvchi doktor Marianna Kimyenti finvalning suv yuzasiga chiqib oziqlanishi odatiy hol ekanini tushuntirgan.
«Finval uchun suv yuzasiga ko‘tarilib, o‘sha yerda oziqlanish mutlaqo tabiiy — bu uning ozuqa topish strategiyasining bir qismi. Ammo uni qirg‘oqqa yaqin suvlarda ko‘rish chindan ham hayratlanarli», - degan tadqiqotchi.
Uning aytishicha, nazariy jihatdan bu paytga kelib kitlar boshqa hududlarga ko‘chib ketgan bo‘lishi kerak edi. Biroq finvallarning migratsiyasi va hayot tarziga oid ko‘plab jihatlar hali yetarlicha o‘rganilmagan. Ular salqinroq suvlarni afzal ko‘rishi taxmin qilinadi.