Tramp Saudiyaning harbiy yordam soʻrovi tufayli dilemmaga duch keldi
Muhammad bin Salmonning ketma-ket qoʻngʻiroqlaridan soʻng prezident Tramp uzoq ikkilandi. Biroq Saudiya Arabistoni bilan birgalikda Yamandagi husiylarga qarshi urushga qoʻshilmaslikka qaror qildi.
Tramp Saudiyaning harbiy yordam soʻrovi sababli murakkab vaziyatga tushib qoldi
AQSH va Isroilning Eronga qarshi urushi davom etayotgan bir paytda, Vashington yana bir ogʻir savol bilan yuzlashdi. Bu savol soʻnggi ikki haftadan beri AQSH prezidenti Donald Trampni qiynab kelmoqda: Saudiya Arabistonining iltimoslariga rozi boʻlib, AQSH harbiylariga husiylar nazoratidagi nishonlarga zarba berishni buyurish kerakmi?
Bunday qaror esa husiylarni qoʻllab-quvvatlaydigan Eronga qarshi urushda yana bir front ochib yuborishi mumkin edi. Tramp esa oʻzi boshlab, butun dunyo iqtisodiyotiga zarba berib kelayotgan urushni yarim yildan ortiq vaqtdan beri yakunlay olmayapti.
Tramp Saudiya Arabistonining husiylarga qarshi kurashda yordam soʻrab qilgan murojaatlari yuzasidan bir necha hafta davomida ikkilanib kelgan.
17-sentabr, payshanba kuni vaziyat yanada keskinlashdi. AQSH maʼmuriyati rasmiylarining nashrga aytishicha, Saudiya Arabistoni valiahd shahzodasi Muhammad bin Salmon prezidentga qoʻngʻiroq qilgan. Qirollikning de-fakto rahbari va Eron urushida AQSHning asosiy ittifoqchisi boʻlgan shahzoda jadal ilgarilayotgan husiylar hujumini sekinlashtirishga yordam berish uchun Trampdan yana bir bor aralashishni soʻragan.
Tramp bundan bir kun oldin maslahatchilari bilan uchrashib, ularga zarbalar berish tarafdori emasligini aytgan edi. Ammo valiahd shahzoda bilan suhbatdan soʻng u fikrini oʻzgartirib, Pentagonga havo zarbalariga tayyorgarlik koʻrishni buyurdi.
Biroq yakshanba kuni tushga kelib, prezident yana fikridan qaytganga oʻxshadi, deb yozadi Times. Nashr bilan gaplashgan Oq uy rasmiylariga koʻra, AQSH husiylarga havo zarbalari bermaydi. Hech boʻlmaganda hozircha. Rasmiylar harbiy rejalarni muhokama qilish vakolatiga ega boʻlmagani uchun ismlarini oshkor qilmaslik sharti bilan gapirgan.
Oq uy matbuot xizmati esa Trampning qaror qabul qilish jarayoniga rasman izoh berishdan bosh tortdi. Maʼmuriyatning yuqori martabali rasmiylaridan biri faqat shunday dedi: «AQShning Saudiya Arabistoni bilan mudofaa kelishuvi bor va biz doim ittifoqchilarimizni himoya qilamiz».
Maʼmuriyatdagi yana bir yuqori lavozimli manbaga koʻra, prezidentning yaqin atrofidagilarning aksariyati Saudiyaning husiylarga qarshi urushiga qoʻshilishga shubha bilan qaragan yoki bunga ochiq qarshi chiqqan. Buning asosiy sababi AQSH harbiylari Eron bilan urushda allaqachon duch kelayotgan bosim edi.