Toʻqayev mudofaa vazirini ishdan oldi
Dauren Kosanov Qozogʻiston mudofaa vazirligini 2025-yil yozidan buyon boshqarib kelayotgandi. Sentabrda u shu lavozimga qayta tayinlangandi. Isteʼfo Kaspiy dengizidagi mashgʻulotlarda 14 nafar harbiy halok boʻlishidan bir necha kun oʻtib roʻy bermoqda. Ushbu ish doirasida besh nafar harbiy amaldor hibsga olingan.
Toʻqayev mudofaa vazirini lavozimidan oldi
Kaspiy dengizida oʻtkazilgan mashgʻulot vaqtida 14 nafar harbiy choʻkib ketgani ortidan Qozogʻiston mudofaa vaziri Dauren Kosanov lavozimidan ozod qilindi. Tegishli farmonni prezident Qosim Joʻmart-Toʻqayev imzolagan.
«Davlat rahbarining farmoni bilan Dauren Jumatayevich Kosanov Qozogʻiston Respublikasi mudofaa vaziri lavozimidan ozod etildi», – deyiladi prezident saytida eʼlon qilingan xabarda.
Kosanov 2025-yil yozidan beri Qozogʻiston mudofaa vaziri sifatida faoliyat yuritib kelayotgandi.
24-sentabr kuni Qozogʻiston gʻarbidagi Mangʻistau oblastida mamlakat harbiy-dengiz kuchlari mashgʻulotlari paytida Kaspiy dengizi sohilida ob-havo keskin yomonlashib, kuchli shamol koʻtarilgan, oqibatda 17 nafar harbiyni kuchli toʻlqin olib ketgan. Ulardan faqat uch nafari qutqarilgan, suvdan 14 kishining jasadi chiqarib olingan.
Qozogʻiston Bosh prokuraturasi bu holat yuzasidan jinoyat ishi ochdi. Oradan koʻp oʻtmay besh kishi — harbiy-dengiz kuchlari qoʻmondonining birinchi oʻrinbosari, ikkita harbiy qism komandiri, piyodalar rotasi boshligʻi hamda kater komandiri hibsga olindi. Ularga nisbatan xizmatga sovuqqonlik bilan munosabatda boʻlish ogʻir oqibatlarga sabab boʻlgani hamda kemani boshqarish qoidalarini buzish bilan bogʻliq moddalar boʻyicha tergov olib borilmoqda. Qozogʻiston ichki ishlar vazirligi yana hibslar boʻlishi mumkinligini istisno etmadi.