Qozog‘istonda 25-sentyabr milliy motam kuni deb e’lon qilindi
Qozog‘istonda 25-sentyabr milliy motam kuni deb e’lon qilindi
Qozog‘iston prezidenti Qosim-Jo‘mart To‘qayev Mang‘istov viloyatidagi mashg‘ulotlar vaqtida harbiylar halok bo‘lgani munosabati bilan mamlakatda milliy motam e’lon qildi.
Oqorda matbuot xizmatining xabar berishicha, davlat rahbarining farmoyishi bilan xizmat burchini bajarish chog‘ida harbiylar halok bo‘lgani sababli 2026-yil 25-sentyabr kuni Qozog‘iston Respublikasida milliy motam kuni etib belgilandi.
Bugun, 24-sentyabr kuni Mang‘istov viloyatida Qozog‘iston Qurolli kuchlari Harbiy-dengiz kuchlarining mashg‘ulotlari bo‘lib o‘tayotgan edi. Kaspiy dengizi qirg‘og‘ida jangovar tayyorgarlik topshirig‘ini bajarayotgan 19 nafar harbiyni ob-havo keskin yomonlashgani va kuchli shamol esgani sababli suv oqizib ketgan.
Mudofaa vazirligi avvaliga 9 nafar harbiy halok bo‘lgani va uch kishi qutqarib olinganini ma’lum qilgandi. So‘nggi ma’lumotlarga ko‘ra esa qurbonlar soni 12 nafarga yetgan.
Bosh prokuratura Oqtov garnizonidagi mashg‘ulotlarda harbiylar halok bo‘lgani holati bo‘yicha jinoyat ishi qo‘zg‘atilib, tergov harakatlari olib borilayotganini ma’lum qildi. Hodisadan so‘ng hukumat komissiyasi tuzildi. Bosh vazir o‘rinbosari Qanat Bozumbayev fojia yuz bergan joyga bordi.
Qosim-Jo‘mart To‘qayev harbiylar halok bo‘lgani munosabati bilan hamdardlik bildirdi hamda fojia sabablarini atroflicha tergov qilishni buyurdi. Fojia sababli Oqtov shahrida “Shahar kuni” munosabati bilan o‘tkazilishi rejalashtirilgan barcha bayram tadbirlari bekor qilindi.