To‘yiga millionlab dollar sarflab, qisqa vaqt ichida ajrashgan mashhur yulduzlar

To‘yiga millionlab dollar sarflab, qisqa muddat ichida ajrashgan mashhur yulduzlar

**Bred Pitt va Jenifer Eniston: hashamatli to‘ydan keyin so‘ngan muhabbat**

2000-yilda Bred Pitt va Jenifer Enistonning to‘yi shou-biznesda eng ko‘p gapirilgan voqealardan biriga aylandi. Tadbir yopiq o‘tkazilgan bo‘lsa-da, paparatssilar va jurnalistlar Malibu qirg‘oqlarini o‘rab olishdi. Dronlar orqali faqat gullarga burkangan oppoq chodirlar tasvirga tushirildi, qolgan hammasi esa kadr ortida qoldi.

Ichkaridagi holatni ishtirokchilar va taklif etilgan mehmonlar so‘zlab berdi. Jenifer qo‘lda marjon bilan bezatilgan Lawrence Steele’ning hashamatli libosida va o‘sha davrning eng mashhur dizaynerlaridan biri Manolo Blahnik poyabzalida ko‘rindi. Bred nikoh uzuklaridan tortib gul kompozitsiyalarigacha bo‘lgan tayyorgarlik jarayonida shaxsan qatnashdi. Uning g‘oyasiga ko‘ra, marosim maydonchasi atrofida shinam fransuz bog‘larini eslatuvchi haqiqiy gulzorlar barpo etildi.

Mehmonlarga yuqori navli shampan vinosi tortildi, 13 daqiqalik mushakbozlik uyushtirildi va yevangelist xori taklif qilindi. Ammo eng yodda qolgan jihat ziyofat bo‘ldi: keyinchalik aktyor Maykl Rapaport eslashicha, to‘yda ikradan yasalgan butun boshli devor bo‘lgan va u qutilarda mehmonlarga tarqatilgan ekan.

Shunga qaramay, 2005-yil yanvarida er-xotin ajrashganini e’lon qildi. Rasmiy bayonotda ular: “Qaror ongli ravishda, mish-mishlar ta’sirisiz qabul qilindi. Biz do‘st bo‘lib qolamiz”, deb aytishdi. Ammo tez orada asl sabab Pittning “Janob Smit va Smit xonim” filmida rol o‘ynagan Anjelina Joli bilan ishqiy munosabati ekani ma’lum bo‘ldi.

**Kim Kardashyan va Kris Hamfris: 72 kunlik nikoh**

2011-yilda mashhur model o‘zidan 4 yosh kichik va 47 santimetr baland bo‘lgan basketbolchi Kris Hamfrisni tanladi.

To‘y Santa-Barbarada qirollar oilasiga munosib darajada dabdabali tarzda o‘tkazildi. Kim bir kunda uchta libos almashtirdi: Vera Vangning ko‘ylaklaridan tortib o‘zining dizaynerlik ishlarigacha. Bayram bir necha kun davom etdi, mehmonlarga nafis taomlar tortiq qilindi va asal oyi Italiyada boshlandi.

Biroq nikoh marosimidan atigi 72 kun o‘tgach, Kim ajrashish uchun ariza berdi. Darhol bu to‘y emas, balki “Kardashyanlar oilasi” realiti-shousining bir qismi ekani haqidagi mish-mishlar tarqaldi. Bu gap-so‘zlar asossiz emasdi: marosim jonli efirda namoyish etildi va eksklyuziv fotosuratlar huquqi People jurnali tomonidan katta mablag‘ evaziga sotib olindi.

Kris Hamfris soxta nikoh g‘oyasini qat’iyan rad etdi: “Bizning his-tuyg‘ularimiz haqiqiy edi. Men Kimni sevardim va oilamizga ishonardim”. Biroq ularning birgalikdagi hayot haqidagi qarashlari mos kelmadi: Kim karyerasini davom ettirishni, suratga tushishni va diqqat markazida yashashni istardi, Kris esa Minnesotada sokin hayot kechirishni orzu qilardi. Murosa topishning imkoni bo‘lmadi.

U tez orada Kanye Vest bilan munosabat boshladi, Hamfris esa qiyinchiliklarga duch keldi: uni basketbolchi sifatida emas, balki “Kimning eri” sifatida qabul qilishdi va bu uning faoliyatiga jiddiy ta’sir ko‘rsatdi.

**Anjela Beybi va Xuan Syaomin: 43 million dollarlik tantana**

2015-yilda xitoylik aktrisa va model, xalq orasida “xitoylik Kim Kardashyan” nomi bilan tanilgan Anjela Beybi tarixdagi eng qimmat to‘ylardan birini tashkil qildi. Uning umr yo‘ldoshi mashhur aktyor Xuan Syaomin edi. Xarajatlar 43 million dollarni tashkil etib, bu Kim Kardashyanning to‘yidan deyarli besh barobar ko‘p edi.

Marosim sobiq Xitoy—Rossiya do‘stligi saroyida bo‘lib o‘tdi. Ulkan tantanaga 2000 nafar mehmon taklif etilgan edi. Kelinning Dior brendidagi libosi deyarli yarim yil davomida nozik organzadan tikilib, qo‘l mehnati bilan bezatildi. Faxriy mehmon va kuyovning do‘sti sifatida mashhur pianist Li Yundi maxsus asar ijro etdi.

Har bir mayda tafsilot puxta rejalashtirilgan edi: yoritish, gulli arkalar, nafis taomlar. Butun Osiyodan kelgan muxlislar har bir lahzani kuzatib, liboslarni muhokama qilib, nikoh qasamyodlaridan iqtiboslar keltirishardi.

Ammo oilaviy baxt atigi 7 yil davom etdi. 2022-yilda er-xotin ajrashganini e’lon qildi. Sabablar oshkor etilmadi, biroq ijtimoiy tarmoqlardagi qo‘shma bayonotda ular shunday yozishdi: “Bo‘lib o‘tgan barcha narsa uchun rahmat” . Bu ibora qizg‘in muhokamalarga sabab bo‘ldi: bu ularning do‘stona munosabatlarni saqlab qolishini anglatadimi yoki shunchaki yakuniy ajralishni yumshatish urinishimi?

**Shahzoda Charlz va Diana: XX asrning eng ulug‘vor to‘yi**

1981-yilda shahzoda Charlz va Diananing to‘yi XX asrning eng dabdabali voqealaridan biriga aylandi. Shu kuni Buyuk Britaniyada dam olish kuni e’lon qilindi — millionlab odamlar marosimni televizor orqali kuzatishdi. Qirolicha Yelizaveta II faxr bilan porlab turardi, ammo yosh kelin-kuyovning o‘zi unchalik baxtli ko‘rinmasdi.

Diana 7,9 metrli shleyfi bor hashamatli ko‘ylak kiygan — bu rekord uzunlik edi. Uning yaratuvchilari, dizaynerlar Devid va Elizabet Emanuel har bir santimetrni puxta hisoblab, shleyf kirish joyidan mehrobgacha bo‘lgan yo‘lga mukammal tushishini ta’minlashdi. Kelin guldastasi deyarli 2 kilogramm og‘irlikda bo‘lib, orxideya, gardeniya, mirta, pechak va marvaridgullardan iborat edi — har bir gul o‘ziga xos ramziy ma’noga ega bo‘lgan.

Avliyo Pavel soboridagi marosimga 3,5 ming mehmon tashrif buyurdi. Ular uchun 27 ta to‘y torti tayyorlandi, kechqurun esa butun mamlakat bo‘ylab mushakbozlik o‘tkazildi.

Aslida Charlz hech qachon Kamilla Parker-Boulzni sevishdan to‘xtamagan edi. Ularning munosabatlari Diana bilan turmush qurganidan keyin ham davom etdi. Bu keyinchalik ma’lum bo‘ldi, ammo o‘sha paytlardayoq alomatlar bor edi: sovuqqonlik, yaqinlik yo‘qligi, ommaviy kelishmovchiliklar. 1996-yilda er-xotin rasman ajrashdi. Bir yil o‘tgach, Diana avtohalokatda fojiali tarzda vafot etdi.