Toshkentda temperatura inversiyasi hafta oxirigacha saqlanib qoladi — Oʻzgidromet
Issiq va quruq ob-havo fonida kuzatilayotgan temperatura inversiyasi Toshkentda 1 noyabrgacha saqlanib qoladi. Yogʻingarchilikning yoʻqligi, kuchsiz shamol va inversiya atmosferaning oʻz-oʻzini tozalashini sekinlashtiradi va havoda chang zarrachalari kontsentratsiyasining oshishiga yordam beradi, deb ogohlantirdi Oʻzgidromet.
Toshkentda temperatura inversiyasi hafta oxirigacha saqlanib qoladi — Oʻzgidromet
Hafta davomida Toshkentda nisbatan issiq va quruq ob-havo prognoz qilinmoqda. Kunduzi havo +18…+20 darajagacha, kechasi esa taxminan +8…+10 darajagacha isib boradi. Kutilayotgan meteorologik sharoitlar fonida 1 noyabrgacha shaharda atmosfera inversiyasi kuzatiladi, xabar beradi Oʻzgidromet.
«Yoʻgʻingarchilikning yoʻqligi, nisbatan kuchsiz shamol va inversiya birgalikda atmosferaning tabiiy oʻz-oʻzini tozalash jarayonini sekinlashtirishi mumkin. Shu munosabat bilan 1 noyabrgacha Toshkentda chang zarrachalari va boshqa ifloslantiruvchi moddalar kontsentratsiyasi ortishi yoki ularning yuqori darajasi saqlanib qolishi mumkin», — deyiladi xabarda.
Oʻzgidrometda, shuningdek, atmosfera havosi sifatining haqiqiy holati va uning oʻzgarishi ifloslantiruvchi moddalar chiqarilishi hajmiga, shuningdek, shamolning tezligi va yoʻnalishiga bogʻliqligini qoʻshimcha qilishdi.
Atmosfera inversiyasi — bu meteorologik hodisa boʻlib, unda havo harorati balandlik bilan odatdagidek pasaymaydi, aksincha, koʻtariladi. Bunday inversiyada yer yuzasidagi sovuq havo qatlami ustida issiqroq qatlam hosil boʻladi. Bu havo massalarining vertikal aralashishiga toʻsqinlik qiladi va atmosferaning quyi qatlamlarida chang zarrachalari va boshqa ifloslantiruvchi moddalarning toʻplanishiga yordam berishi mumkin.