Toshkentda bugun kechqurun havo sifati yomonlashishi mumkin
Toshkentda bugun kechqurun havo sifati yomonlashishi mumkin
22-sentyabr soat 21:00 dan 23-sentyabr tongi soat 04:00 gacha Toshkentda harorat inversiyasi kuzatilishi kutilmoqda. Bunda yer yuzasiga yaqin havo sovib, yuqoriroq qatlamdagi havo nisbatan iliq bo‘lib qoladi.
Prognozlarga ko‘ra, poytaxtda ayrim soatlarda shamol tezligi 0,5–1 metr/sekundgacha pasayadi, havoning vertikal aralashuvi esa sekinlashadi. Yog‘ingarchilik kutilmagani sababli PM2,5 va PM10 zarrachalarining yerga yaqin qatlamda to‘planishi uchun sharoit yuzaga kelishi mumkin.
Kutilayotgan holat tufayli 22:00 va 01:00 oralig‘ida Toshkentning aksariyat hududlarida havo sifati AQI bo‘yicha “sezgir guruhlar uchun nosog‘lom” darajagacha yomonlashishi mumkin. Ertalab inversiya zaiflashib, havo sifati asta-sekin yaxshilanishi kutilmoqda.
Shu bois kechki paytlarda ochiq havoda uzoq vaqt bo‘lmaslik tavsiya etildi. Atmosfera havosi sifati hozirda Maxsus komissiya tomonidan doimiy nazorat qilinmoqda.
18-sentyabr kuni kechqurun Toshkent shahrida atmosfera havosidagi PM2,5 va, ayniqsa, PM10 zarrachalari miqdori qisqa vaqt ichida keskin oshgandi. Maxsus komissiya ma’lumotiga ko‘ra, bunga quruq ob-havo, havoning sust almashinuvi va chang massalarining hududga kirib kelishi birgalikda sabab bo‘lgan.