Saudiya Arabistoni rasmiylari Makkadagi masjidda xudkush terrorchi boʻlgani haqidagi xabarlarni rad etdi. Video

2 soat oldin

Ijtimoiy tarmoqlarda Makkadagi Al-Haram masjidida xudkush terrorchi qoʻlga olingani aytilgan xabarlar tarqalmoqda. Erkak Kaʼba yaqinida boʻlgani va goʻyoki yonida portlovchi modda toʻla kamar boʻlgani taʼkidlanmoqda. Saudiya rasmiylari bu maʼlumotni rad etdi.

Muqaddas shahar xavfsizlik organlari erkak kishi qoʻlga olinganini maʼlum qildi, biroq rasmiy talqinga koʻra, uning harakatlari teraktga tayyorgarlik bilan bogʻliq boʻlmagan. Bayonotda aytilishicha, u yoʻlovchilarga shilqimlik qilgan hamda ular orasida qoʻrquv va vahima uygʻotgan. Qoʻlga olingan shaxsga nisbatan zarur choralar koʻrilgan.

Saudiya rasmiylari ijtimoiy tarmoqlarda tarqalayotgan xudkush terrorchi haqidagi daʼvolar haqiqatga toʻgʻri kelmasligini alohida taʼkidladi. Shu bilan birga, qoʻlga olingan shaxsning kimligi va sodir boʻlgan voqea tafsilotlari haqida qoʻshimcha maʼlumotlar berilmagan.

Makkadagi Al-Haram masjidi islom olamining bosh muqaddas qadamjosi hisoblanadi. Uning markazida butun dunyo musulmonlari namoz vaqtida yuzlanadigan Kaʼba joylashgan.

Eslatib oʻtamiz, sentyabr oyida Saudiya Arabistoni mamlakat rasmiylari maʼlumotlariga koʻra, Makka tomon yoʻnaltirilgan uchuvchisiz uchish apparati urib tushirilganini maʼlum qilgan edi. Dron 15 sentyabr kuni kechqurun shahardan janubda, parvozlar taqiqlangan havo hududiga kirishdan oldin tutib qolingan, deb xabar bergandi Saudiya rahbariyati.

Saudiya Arabistoni boshchiligidagi Yamandagi harbiy koalitsiya vakili Turki al-Maliki dron husiylarga tegishli boʻlgani va bu Makkaga hujum qilish boʻyicha ikkinchi urinish ekanini maʼlum qilgan. Harakat vakillari, oʻz navbatida, shahar dronning nishoni boʻlgani haqidagi daʼvoni rad etishgan.

Oʻzbekiston TIV oʻshanda tomonlarni maksimal darajada vazminlik koʻrsatishga, xalqaro huquq normalariga rioya qilishga hamda davlatlarning suvereniteti va hududiy yaxlitligini hurmat qilishga chaqirgan edi.