Ryanair yoʻlovchisi bomba haqidagi tahdidni «ruhiy jarohat yetkazuvchi» deb atadi
Sara Jonsning aytishicha, Ispaniyaning Mursiya shahriga qoʻngandan soʻng yoʻlovchilar angarda uch soat kutishlariga toʻgʻri kelgan.
Ryanair yoʻlovchisi bomba xavfi haqidagi xabarni "ruhiy jarohat" deb atadi
Ryanair aviakompaniyasi samolyotining yoʻlovchisi bomba xavfi haqidagi gumonlardan soʻng havo kemasining evakuatsiya qilinishini "ancha ruhiy jarohat yetkazuvchi" deb taʼrifladi.
Sara Jonsning aytishicha, Manchesterdan Mursiya aeroportiga qoʻnganidan soʻng samolyotni politsiya, oʻt oʻchirish brigadalari va bombani zararsizlantirish boʻyicha mutaxassislar oʻrab olgan.
Manchesterlik tibbiyot xodimining taʼkidlashicha, u va boshqa yoʻlovchilarga buyumlarini samolyotda qoldirish aytilgan, soʻng havo kemasi tintuv qilinayotgan bir vaqtda ular aeroport angarida uch soatcha vaqt oʻtkazishgan.
Ispaniya rasmiylari hech qanday portlovchi modda topilmaganini bildirdi. Ushbu samolyot Yevropa boʻylab aeroportlarda bomba oʻrnatilgani haqidagi gumonlar tufayli tekshirilgan yettita havo kemasidan biri edi.
Jons hamkasblari Sharlotta va Elli bilan Ispaniya janubi-sharqidagi La-Manga shahrida oʻtkazilayotgan golf turnirida tibbiyot xodimi sifatida ishlash uchun ketayotgan edi.
Uning aytishicha, samolyot mahalliy vaqt bilan soat 10:30 da (Grinvich boʻyicha 09:30) qoʻnguniga qadar parvoz bir maromda kechgan.
"Biz qoʻnganimizda, samolyot juda tez toʻxtadi va bizni u yerda bir oz ushlab turishdi", dedi u Bi-bi-siga.
Yoʻlovchilar avvaliga terminalga tomon harakatlanish uchun ruxsat kutishyapti deb oʻylashgan.
"Keyin bizni politsiya, bomba zararsizlantirish guruhi, tez yordam mashinalari va oʻt oʻchirish mashinalari oʻrab oldi", dedi u.
"Soʻng bizga samolyotni evakuatsiya qilishimiz kerakligi, lekin oʻzimiz bilan hech narsa olishga ruxsat berilmasligi aytildi.
Biz bagajlarimizni tepadagi javonlarda qoldirishimizga toʻgʻri keldi."
Jonsning aytishicha, yoʻlovchilar aeroport tomon piyoda yurishgan va avvaliga ularga nima sodir boʻlgani haqida juda kam maʼlumot berilgan.
Uning taʼkidlashicha, politsiya xodimi unga xavfsizlikka tahdid boʻlganini aytgan, ammo bu aeroportga yoki samolyotga tegishli ekanini ochiqlamagan.
Keyinchalik ularga samolyotga nisbatan bomba tahdidi boʻlgani aytilgan, dedi Jons.
Uning aytishicha, xizmat itlari samolyotni tintuv qilgan va yoʻlovchilarning bagajlari tekshirilgan.
"Menimcha, nima boʻlayotganini bilmaganimizdan koʻproq tushkunlikka tushdik", dedi u.
Jonsning aytishicha, yoʻlovchilar vazminlikni saqlab kalashgan, ammo suv berilguniga qadar issiq havoda tashqarida vaqt oʻtkazishgan.
Oxir-oqibat ularga bagajlarini olish uchun samolyotga orqa eshik orqali qaytishga ruxsat berilgan, shundan soʻng ular oldingi eshikdan chiqib, aeroportga kirishgan.
Jonsning aytishicha, ular aeroportni mahalliy vaqt bilan soat 14:00 dan keyin tark etishgan.
Ispaniya rasmiylarining bildirishicha, reys bortida ekipaj aʼzolari bilan birga 121 kishi boʻlgan.
Boshqa havo kemalari Polsha, Italiya va Bolgariyada tekshirilgan.
Tahdidlarning bir-biriga bogʻliqligi nomaʼlum.
Uslubsiz harakat sifatida baholagan Buyuk Britaniya hukumati ushbu hodisalarni "gʻarazli soxta tahdidlar" deb taʼrifladi va aviatsiyadagi mumkin boʻlgan tahdidlarga qarshi kurashish uchun sinovdan oʻtgan tartib-qoidalarga ega ekanini aytdi.