Reperlar Falastinni qoʻlladi, husiychilar muvozanatni oʻzgartirmoqda – hafta dayjesti
Hafta davomida Rossiyada urush davridagi ilk parlament saylovi boshlandi, Zelenskiy qoʻshni davlatlar bilan yangi ittifoq tuzilganini eʼlon qildi. Yaman husiychilari atrofidagi vaziyat jiddiy tus oldi. Amerika Rossiyaga qarshi «jahannam sanksiyalari» eʼlon qildi. Quyida haftaning shu va boshqa muhim voqealarini yodga olamiz.
Reperlar Falastinni qoʻllab-quvvatladi, husiychilar esa muvozanatni oʻzgartirmoqda – hafta dayjesti
Rossiyada urush davridagi birinchi parlament saylovi boʻlib oʻtmoqda. 18-sentabr kuni boshlangan ovoz berish bugun, 20-sentabr kuni yakunlanadi. Urush paytida Rossiyada prezidentlik saylovi oʻtkazilgan edi, biroq parlament urushdan oldingi mandat bilan ishlayotgan edi. Davlat dumasi IX chaqirigʻi uchun saylovlarda rossiyaliklar 450 deputatni tanlaydi. Bundan tashqari, mamlakatning 11 hududida mahalliy rahbarlar ham saylanmoqda. Ukraina bilan chegaradosh Belgorod, Bryansk kabi oblastlarda, shuningdek, oʻzbekistonliklar uchun qiziq boʻlgan Chechenistonda ham hududiy rahbarlik uchun saylovlar boʻlib oʻtmoqda.
Bu safar Rossiya muxolifati saylov arafasida nihoyat birlashishga muvaffaq boʻldi. Hozir rossiyaliklar orasida eng mashhur siyosatchi hisoblangan Maksim Kats marhum muxolifat yetakchisi Aleksey Navalniyning bevasi Yuliya Navalnaya bilan birga ovoz berish tavsiya etilgan nomzodlar roʻyxatini eʼlon qildi. Bu gal muxolifat hukmron «Yedinaya Rossiya»ning eng kuchli raqiblariga ovoz berishga chaqirdi.
Urushga qarshi yagona partiya boʻlgan «Yabloko» saylovdan chetlatilgan edi, ammo partiyaning ayrim nomzodlari saylovlarda qatnashmoqda. Urushga qarshi rossiyaliklar aynan ularga ovoz berishi kutilmoqda. «Yabloko» saylovning birinchi kunidan keyin partiya kuzatuvchilari ommaviy ravishda uchastkalarga qoʻyilmagani haqida xabar berdi. Saylov natijalariga alohida toʻxtalamiz.
Ukraina prezidenti Volodimir Zelenskiy yangi hamkorlik tashkiloti – «Karpat sakkizligi» (S8) tuzilganini maʼlum qildi. Unga Ukraina, Ruminiya, Serbiya, Polsha, Slovakiya, Chexiya, Avstriya va Mojariston kiradi. Ishtirokchilar xavfsizlik, energetika, logistika va transchegaraviy iqtisodiy yoʻnalishlarda hamkorlik qilishi kutilmoqda. Tashkilotning ilk yigʻilishi Ukrainaning Ivano-Frankivsk viloyatida oʻtkazildi va unda Polsha, Serbiya hamda Ruminiya liderlari qatnashdi.
Indoneziyada ulkan paromning choʻkishi katta shov-shuvga sabab boʻldi. Parom Yava dengizida halokatga uchrab, 30 metr chuqurlikka choʻkib ketgan. Bortdagi 243 kishidan 108 nafari omon qolgani aniqlangan, qolganlari hanuz qidirilmoqda. Shuningdek, paromda 89 ta mashina ham boʻlgan.
Kema 20 soatlik yoʻlga chiqqan paytda toʻlqinlar orasida qolib, muvozanatini yoʻqotgan. Kapitan kema ogʻayotganini bildirgan signal yuborgan, biroq keyinroq ekipaj bilan aloqa uzilgan. Parom manzilga 148 km qolganida agʻdarilgan. Ekipaj aʼzolaridan birining aytishicha, hammasi juda tez sodir boʻlgan, kema 5 daqiqa ichida choʻkib ketgan.