Rossiyada parlament saylovlari boshlandi
Rossiyada 18-sentabr kuni Davlat dumasi deputatlarini saylash uchun uch kunlik ovoz berish boshlandi. Saylov uchastkalari dastlab Kamchatka va Chukotkada ochildi, ovoz berish 20-sentabrga qadar davom etadi.
Rossiyada parlament saylovlari boshlandi
Rossiyada 18-sentabr, juma kuni soat 08:00 dan Davlat dumasiga saylovlar rasman start oldi. Mamlakat hududlari orasidagi vaqt tafovuti sabab birinchi bo‘lib Kamchatka va Chukotkadagi saylov uchastkalari ish boshladi.
Ovoz berish uch kun — 18, 19 va 20-sentabr kunlari davom etadi. Hududlardagi saylov uchastkalari mahalliy vaqt bilan soat 20:00 gacha faoliyat yuritadi.
Davlat dumasining yangi chaqiriqdagi 450 deputati aralash saylov tizimi asosida saylanadi. Ularning yarmi — 225 deputat bir mandatli saylov okruglarida, ya’ni saylovchilar muayyan nomzodga ovoz berish orqali saylanadi. Qolgan 225 o‘rin esa partiyalar ro‘yxati bo‘yicha ovoz berish natijalariga ko‘ra taqsimlanadi.
DW ma’lumotiga ko‘ra, partiya ro‘yxati bo‘yicha saylovda 10 ta partiya qatnashmoqda. «Yabloko» partiyasi esa avvalroq rasmiy sabablar bilan partiyaviy ro‘yxat bo‘yicha saylovdan chetlatilgan. Shu bilan birga, partiyaning ayrim vakillari bir qator hududlarda bir mandatli okruglardan nomzod sifatida ishtirok etmoqda.
Ukrainaning Rossiya nazoratidagi hududlarida ham ovoz berish o‘tkazildi
Rossiyada avvalgi Davlat dumasi saylovlari 2021-yilda bo‘lib o‘tgan edi. 2026-yilgi saylov jarayoni doirasida Rossiya Ukrainaning o‘zi nazorat qilayotgan hududlarida ham ovoz berishni tashkil etdi. Ukraina va xalqaro hamjamiyatning katta qismi bu hududlarni Rossiya tarkibi sifatida tan olmaydi.
Rossiyaning Ukrainaga qarshi urushida qatnashgan harbiylar, shuningdek, Rossiya nazoratidagi Ukraina hududlarida yashovchilar uchun muddatidan oldin ovoz berish avgust oyi oxiridan 17-sentabrga qadar o‘tkazilgani Rossiya rasmiy tuzilmalari tomonidan ma’lum qilindi.
DW keltirgan kuzatuvchilar fikricha, mazkur hududlardagi ovoz berish natijalarini mustaqil tekshirish imkoniyatlari cheklangan. Xususan, hududiy saylov komissiyalari a’zolari haqidagi ma’lumotlar va ayrim saylov uchastkalari manzillari ochiq e’lon qilinmagani, ochiq videokuzatuv tashkil etilmagani qayd etilgan.
Shuningdek, ko‘chma saylov qutilaridan foydalanishga ruxsat berilgan. Rossiya Markaziy saylov komissiyasi mahalliy komissiyalarga zarurat tug‘ilganda byulletenlarni joyida chop etish hamda ovozlar sanab bo‘lingach, ularni darhol yuqori turuvchi saylov organlariga topshirmaslik imkonini bergani ham maqolada keltirilgan.