Putin Ukrainani Rossiyadagi parlament saylovlariga aralashishda aybladi
Putin Ukrainani Rossiyadagi parlament saylovlariga aralashishda aybladi
Rossiya prezidenti Vladimir Putin Ukraina urushni yakunlashga qaratilgan muzokaralarga ataylab to‘sqinlik qilayotganini bildirdi. U, shuningdek, Kiyevni Rossiyadagi parlament saylovlariga aralashayotganlikda aybladi.
Putin bu fikrlarni Rossiya Harbiy-sanoat komissiyasi yig‘ilishida aytib, hech qanday dalil taqdim etmadi.
“Ukraina rahbariyati saylov o‘tkazishga shoshilmayapti. Lekin ular bizga xalaqit berishga urinmoqda”, dedi Putin.
Uning so‘zlariga ko‘ra, Ukrainada hokimiyat allaqachon diktaturaga aylangan. Putin buni Ukraina rahbari Vladimir Zelenskiyning vakolat muddati tugagan bo‘lsa-da, yangi prezidentlik saylovi o‘tkazilmagani bilan izohladi.
Biroq Ukrainada 2022-yilda boshlangan Rossiya bosqinidan beri harbiy holat joriy etilgan. Zelenskiy va boshqa rasmiylar harbiy holat davrida saylov o‘tkazish mumkin emasligini aytadi. Kiyev Rossiyadagi saylovlarni natijasi oldindan ma’lum bo‘lgan “soxta saylov” deb atadi.
Rossiyada uch kunlik parlament saylovlari 18-sentyabr kuni boshlandi. Urushga qarshi nomzodlarning aksariyatiga saylovda qatnashishga ruxsat berilmadi. Reuters xabariga ko‘ra, Kreml saylov natijalarini xalqning Putin siyosatini qo‘llab-quvvatlayotganining dalili sifatida ko‘rsatmoqchi.
Putinning aytishicha, Ukrainaning Rossiya obyektlariga uyushtirayotgan zarbalari Kiyev tinchlik muzokaralariga tayyor emasligini ko‘rsatadi. U bunga misol sifatida Zaporojyening bosib olingan qismidagi hodisani keltirdi. U yerda Ukraina zarbasi oqibatida mahalliy saylov komissiyasi rahbari halok bo‘lgan.
“Shunday jinoyatlarni sodir etish orqali ular tinchlik va muzokaralar bo‘lmasligi uchun hamma narsa qilmoqda”, dedi Putin.
Yig‘ilishda Putin Rossiya mudofaasida hanuz “yadro triadasi”ga — quruqlik, dengiz va aviatsiya qurollariga — tayanilayotganini aytdi. U, shuningdek, havo mudofaasi tizimlarini ham yaxshilash zarurligini ta’kidladi.
Ukraina dron imkoniyatlarini tez sur’atlarda rivojlantirmoqda. Mamlakat Rossiya chegarasidan 3000 kilometr uzoqlikdagi sanoat obyektlariga zarba bermoqda. Bu Rossiyada yonilg‘i ta’minoti va kundalik hayotga xalaqit bermoqda.
“Ha, bunday imkoniyatni istisno qilmaymiz. Biz aynan yaqin istiqbol haqida gapiryapmiz. Ya’ni, taxminan, oktyabr. Oktyabrni istisno qilib bo‘lmaydi”, degan edi Rossiya prezidenti matbuot kotibi Dmitriy Peskov.