Qovurilgan va qayta ishlangan ovqatlar o‘pkaga zarar yetkazishi aniqlandi
Bundan tashqari, olimlar o‘pkada mavjud bo‘lgan bakteriyalar tarkibidagi o‘zgarishlarni aniqladilar.
Qovurilgan va qayta ishlangan ovqatlar o‘pkaga zarar yetkazishi aniqlandi
Qovurilgan hamda yuqori darajada qayta ishlangan mahsulotlarni uzoq muddat iste’mol qilish o‘pka salomatligiga salbiy ta’sir ko‘rsatishi, to‘qimalarga shikast yetkazishi va mikrofloraning o‘zgarishiga olib kelishi mumkin.
Bu xulosaga olimlar sichqonlar ustida o‘tkazilgan tajriba natijalariga tayangan holda kelishdi. Tadqiqot Food & Function (F&F) jurnalida chop etildi.
Mutaxassislar shakar oqsillar va yog‘lar bilan o‘zaro ta’sirlashganda hosil bo‘ladigan moddalar — rivojlangan glikatsiya yakuniy mahsulotlariga (AGE) boy parhezning ta’sirini o‘rgandilar. Ularning konsentratsiyasi, ayniqsa qovurish kabi kuchli issiqlik bilan ishlov berilgan ayrim ovqatlarda yuqori bo‘ladi.
Ushbu taomlar bilan oziqlangan sichqonlarda o‘pka to‘qimalarining shikastlanishi va tizimli yallig‘lanish belgilari kuzatilgani aniqlandi. Xususan, qondagi eozinofillarning ulushi oshdi va neytrofillarning immun tizimining hujayralari — limfotsitlarga nisbati o‘zgardi.
Bundan tashqari, olimlar o‘pkada mavjud bo‘lgan bakteriyalar tarkibidagi o‘zgarishlarni aniqladilar. Potensial patogen mikroorganizmlar soni oshdi, immun jarayonlarini tartibga solishda ishtirok eta oladigan bakteriyalar soni esa kamaydi.
Tahlil shuningdek, o‘pka to‘qimasida metabolik buzilishlarni, jumladan, aminokislotalar bilan bog‘liq o‘zgarishlarni ham aniqladi. Bu shuni ko‘rsatadiki, ovqatlanish odatlari nafaqat ichaklarga, balki nafas olish tizimiga ham ta’sir qilishi mumkin.