Qidiruvdagi avtomashina ustaxonadan topildi
Transport vositasi belgilangan tartibda xatlanib, vaqtincha saqlash uchun jarima maydonchasiga joylashtirilgan.
Qidiruvdagi avtomobil ustaxonadan aniqlandi
Buxoro viloyatining Vobkent tumanida kredit evaziga xarid qilingan va qarzdorlik tufayli qidiruvga berilgan «Cobalt» avtomashinasi ta’mirlash ustaxonasidan topildi.
Ma’lum qilinishicha, fuqaro avtomashinani rafiqasi nomiga kredit asosida rasmiylashtirgan, biroq to‘lovlarni o‘z vaqtida amalga oshirmagan. Shundan keyin bank kredit qarzini undirish maqsadida sudga murojaat qilgan.
Sud hujjatiga ko‘ra, qarzdordan «Kapitalbank» ATB foydasiga 169 mln 730 ming 965 so‘m kredit qarzini undirish hamda undiruvni garov mulki hisoblangan, 2025-yilda ishlab chiqarilgan qora rangli «Cobalt» avtomashinasiga qaratish belgilangan.
Qarzdorlik bartaraf etilmagani sababli uning mol-mulklariga taqiq qo‘yilib, avtomashina qidiruvga berilgan.
Qidiruv ishlari davomida mashina avtomobil ta’mirlash ustaxonasidan topilgan. Ma’lum bo‘lishicha, avtomashinaning ayrim ehtiyot qismlari sotib yuborilgan.
Transport vositasi belgilangan tartibda xatlanib, vaqtincha saqlash uchun jarima maydonchasiga joylashtirilgan.
Hozirda ijro harakatlari davom etmoqda. Shuningdek, bank garov mulkiga yetkazilgan zararni undirish masalasida sudga alohida da’vo kiritishi mumkin.