Payariqda qadimiy qabr, Urgutda ganch haykal boshi topildi
Samarqand viloyatining Payariq tumanida soʻnggi bronza davriga oid boʻlishi mumkin boʻlgan qadimiy qabr, Urgut tumanidagi Qoʻrgʻontepa majmuasida esa ganchdan yasalgan haykal boshi topildi. Buyuk Britaniyaning Heritage Daily ilmiy nashri ushbu topilmalar Oʻzbekistonning boy tarixiy-madaniy merosini yana bir bor namoyon etayotganini qayd etdi.
**Payariqda qadimiy qabr, Urgutda ganch haykal boshi topildi**
Buyuk Britaniyaning Heritage Daily ilmiy onlayn nashri Samarqand viloyatida aniqlangan noyob arxeologik topilmalar haqida ikkita maqola chop etdi.
Nashrning **«Bronza bezaklar Oʻzbekistonda topilgan qadimiy qabr sirini ochishga yordam beradi»** nomli materialida Payariq tumanida tasodifan topilgan qabr haqida maʼlumot berilgan.
Qayd etilishicha, yer ishlari vaqtida mahalliy aholi vakili odam suyaklari, bronzadan ishlangan bilakuzuklar hamda mayda munchoqlarni aniqlagan.
Ayniqsa, bilakuzuklarning shakli mutaxassislar diqqatini tortgan. Ularning uchi konussimon boʻlib, spiralsimon naqshlar bilan bezatilgan.
Arxeologlarning dastlabki bahosiga koʻra, topilmalar Zarafshon vodiysi hududida ilgari aniqlangan soʻnggi bronza davri materiallariga oʻxshaydi. Shu asosda ular miloddan avvalgi XIII–X asrlarga tegishli boʻlishi mumkinligi aytilmoqda.
Heritage Dailyʼning ikkinchi maqolasi Urgut tumanidagi ilk oʻrta asrlarga oid Qoʻrgʻontepa arxeologik majmuasida olib borilayotgan tadqiqotlarga bagʻishlangan.
Qazishmalar chogʻida arxeologlar qadimiy ibodatxona xarobalari orasidan ganchdan yasalgan haykalning bosh qismini topgan.
Mutaxassislar uchun ushbu topilmaning ikonografiyasi alohida ahamiyatga ega. Chunki Qoʻrgʻontepada bundan oldin toʻrt qoʻlli maʼbud tasvirlangan devoriy rasmlar ham aniqlangan.
Yangi topilma Soʻgʻd sanʼati, oʻsha davr diniy tasavvurlari va ibodatxona madaniyatini oʻrganish uchun qoʻshimcha maʼlumot berishi kutilmoqda.
Britaniya nashri Payariqdagi qadimiy qabr va Qoʻrgʻontepadagi topilmalar turli tarixiy davrlarga mansubligiga eʼtibor qaratgan. Birinchisi soʻnggi bronza davriga, ikkinchisi esa ilk oʻrta asrlarga oid.
Heritage Daily xulosasiga koʻra, Oʻzbekiston hududida bronza davridan ilk oʻrta asrlargacha boʻlgan yodgorliklarning muntazam aniqlanib borayotgani mamlakatning boy tarixiy va madaniy merosini oʻrganish uchun katta salohiyat mavjudligini koʻrsatadi.