“Oltin medal olishni kutmagandim”: xalqaro olimpiadada gʻolib boʻlgan oʻzbekistonlik oʻquvchilar bilan suhbat
Abdulloh Razzoqov hamda Islombek Oʻrolov AQShning Nyu-York shahrida oʻtkazilgan NEO Science olimpiadasida biologiya va matematika fanlari boʻyicha yuqori natijalarni qayd etib, oltin medalni qoʻlga kiritdi. Finalgacha 10 mingdan ortiq nomzod orasidan saralangan yosh iqtidor egalari yakuniy bosqichda 32 davlatdan kelgan 600 nafardan ortiq ishtirokchi bilan kuch sinashdi va yakunda gʻoliblar safidan oʻrin oldi. Kun.uz muxbiri bilan suhbatda yigitlar olimpiada qanday boʻlgani va tayyorgarlik jarayonlari haqida gapirib berdi.
“Oltin medal olishni kutmagandim”: xalqaro olimpiadada gʻolib chiqqan oʻzbekistonlik oʻquvchilar bilan suhbat
Abdulloh Razzoqov va Islombek Oʻrolov AQShning Nyu-York shahrida boʻlib oʻtgan NEO Science olimpiadasida biologiya va matematika fanlari boʻyicha yuqori natija koʻrsatib, oltin medalga sazovor boʻldi. Final bosqichigacha 10 mingdan ortiq nomzod orasidan saralangan yosh isteʼdodlar yakuniy etapda 32 davlatdan kelgan 600 nafardan ziyod ishtirokchi bilan bellashdi va oxir-oqibat gʻoliblar qatoridan joy oldi. Kun.uz muxbiri bilan suhbatda yigitlar olimpiada jarayoni va tayyorgarlik haqida soʻzlab berdi.
NEO Science olimpiadasining ilk bosqichi dekabr oyida onlayn tarzda oʻtkazilgan. Unda dunyoning turli mamlakatlaridan 10 mingdan ortiq oʻquvchi qatnashgan. Saralashning keyingi bosqichlarida ishtirokchilar soni kamayib borgan. Yakuniy, yaʼni Grand Final bosqichi esa Nyu-Yorkdagi Kolumbiya universitetida tashkil etilgan.
9-11-sinf oʻquvchilari matematika, fizika, kimyo va biologiya yoʻnalishlarida, 3–8-sinf oʻquvchilari esa matematika va tabiiy fanlar boʻyicha kuch sinashgan. Oʻzbekiston nomidan finalda jami toʻrtta maktabdan 25 nafardan ortiq oʻquvchi ishtirok etgan.
Matematika yoʻnalishida mamlakat sharafini himoya qilgan “Millat Umidi” maktabi oʻquvchisi Islombek Oʻrolovning aytishicha, olimpiada finalida 40 ta savol berilgan. Baholashda toʻgʻri javob uchun ball qoʻshilgan, notoʻgʻri javob uchun esa ball ayirilgan. Shu bois u ishonchi komil boʻlmagan savollarga taxminiy javob belgilashdan koʻra, ularni javobsiz qoldirishni maʼqul koʻrgan.
“Oltin medal olishni kutmagandim. Ismimni ekranda chiqarishganda boshida ishonmadim. Chunki mendan koʻproq mehnat qilgan va yaxshiroq tayyorgarlik koʻrgan oʻquvchilar bor deb oʻylagandim. Sahnaga chiqib, medalni qoʻlimga olganimdagina ushbu yutuq real ekanini angladim. Oʻsha paytda shu kungacha qilgan barcha tayyorgarliklarim va sarflagan vaqtlarim koʻz oldimdan oʻtdi. Bu medal men uchun shunchaki gʻalaba emas, harakatlarimning munosib natijasi boʻldi”,
– deydi u.
Oʻquvchilarning aytishicha, NEO Science olimpiadasida qatnashish gʻoyasi ularga “Millat Umidi” maktabidagi ustozlari tomonidan taklif qilingan. Pedagoglar bolalarga matematika va biologiya fanlaridan xalqaro tanlovda oʻz bilimlarini sinab koʻrishni tavsiya qilgan. Shundan soʻng bolalar bir necha oy davomida darsdan tashqari mashgʻulotlarda tayyorgarlik koʻrgan.
“Ayrim masalalar ustida uzoq vaqt ishlashimizga toʻgʻri kelardi. Javobni topishning oʻzi yetarli emas, nima uchun aynan shunday yechimga toʻxtaganimizni tushunishga harakat qildik. Birinchi bosqichdan keyin oʻzimizga boʻlgan ishonchimiz ham oshdi. Grand Final’ga yoʻllanma olganimizda esa tayyorgarligimizni xalqaro darajada sinab koʻrish imkoniyati paydo boʻlganini his etdik. Eng muhimi, olimpiada menga qiyin topshiriqdan qoʻrqmaslik va javob aniq boʻlmaguncha izlanishda davom etishni oʻrgatdi”,
– deydi Abdulloh Razzoqov.
Ikki oʻquvchining NEO Science olimpiadasidagi natijasi ularning xalqaro tanlovlardagi ilk yutugʻi emas. Islombek bundan avval SEAMO (Southeast Asian Mathematical Olympiad), German Math Olympiad, SASMO (Singapore and Asian Schools Math Olympiad) kabi xalqaro olimpiadalarda qatnashib, bronza va kumush medallarini qoʻlga kiritgan.
Abdulloh esa ilmiy izlanishlarga ham qiziqadi. U ustozlari bilan hamkorlikda turli mavzularda maqolalar tayyorlagan. Jumladan, Daun sindromi bilan yashayotgan bolalar va ular duch kelayotgan muammolarga bagʻishlangan materiallar ustida ishlagan. Oʻquvchining aytishicha, uning ayrim ilmiy ishlari AQSH va Buyuk Britaniyadagi nufuzli jurnallarda chop etilgan.
Islombek Oʻrolov hozir AQSH va Germaniyadagi nufuzli universitetlarga hujjat topshirish uchun portfoliosini shakllantirmoqda. U IELTS imtihonidan 7.0, SAT’dan esa 1410 ball olgan. Uning kelajakdagi rejalari biznes bilan bogʻliq. Abdulloh Razzoqov Germaniyada tibbiyot boʻyicha taʼlim olib, keyinchalik Oʻzbekistonga qaytish va xalqaro standartlarga javob beradigan klinikalar tashkil etishni maqsad qilgan.