NATO Rossiya ichkarisiga zarba berishni muhokama qilmoqda — WSJ
Alyans harbiy qo‘mondonligi tarixda ilk bor o‘tkazilgan simpoziumda Rossiya tajovuzining oldini olish strategiyasini qayta ko‘rib chiqdi. Yangi rejada mudofaa nafaqat chegarani qo‘riqlashni, balki dushman hududidagi harbiy va sanoat obyektlariga aniq zarba berishni ham o‘z ichiga oladi.
**NATO Rossiya hududiga zarba berish variantlarini ko‘rib chiqmoqda — WSJ**
Ukraina va Yaqin Sharqdagi urushlar NATOning strategik yondashuvini o‘zgartirmoqda. Alyans Rossiya hujumiga javoban mamlakat ichkarisiga zarba berish imkoniyatlarini muhokama qilmoqda. Bu haqda The Wall Street Journal yozdi.
Iyun oyida NATO qo‘mondonligi tarixda ilk bor Deep Strike (Chuqur zarba) simpoziumini o‘tkazdi. Tadbir AQSH harbiy-havo kuchlari generali Aleksus Grinkevich rahbarligida bo‘lib o‘tdi. Unda NATO hududini himoya qilish uchun faqat chegara emas, balki Rossiya ichidagi harbiy bazalar va sanoat obyektlariga ham zarba berish masalasi ko‘rib chiqildi.
Ta’kidlanishicha, NATO mudofaa kuchlari avval birinchi to‘lqinni to‘xtatadi, so‘ngra dushman tizimini yakson qiladi.
“Biz qarshi ishlayotgan barcha harbiy tizimni va uni qo‘llab-quvvatlaydigan har qanday obyektni yo‘q qilamiz”, dedi Grinkevich.
AQSH Tomahawk va Atacms raketa tizimlarini modernizatsiya qilmoqda. Yevropa davlatlari ham Storm Shadow, Scalp va Taurus qanotli raketalari zaxirasini ko‘paytirishga kirishdi. Oltita Yevropa davlatida 48 ta yangi arzon qanotli raketa loyihasi e’lon qilingan.
Harbiy mutaxassislar chuqur zarbalar yuzlab kilometr masofani qamrab olishini aytmoqda. Bu raketa va dronlar yordamida Rossiya ichkarisidagi aviabazalar, harbiy lagerlar va energetika obyektlarini yo‘q qilishni anglatadi.
Ukraina allaqachon Rossiya ichidagi harbiy va iqtisodiy obyektlarga zarba bermoqda. Mamlakat buning uchun o‘zida ishlab chiqarilgan Flamingo raketalari va dronlardan foydalanmoqda. Ukrainaning NATOdagi elchisi Alyona Getmanchuk havo hujumidan mudofaa yetarli emasligini bildirdi.
“Havo hujumidan mudofaa — og‘riq qoldiruvchi dori kabidir. U alomatlarni yengillashtiradi, lekin og‘riq manbasiga urish kerak”, dedi Getmanchuk.
Polsha generali Irenush Novak ham urushda javob zarbasi berish muhimligini ta’kidladi.
“Signal shunday bo‘lishi kerak: ahmoqlik qilmang, aks holda jazolaymiz. Lekin buning uchun bizda real imkoniyat bo‘lishi kerak”, dedi Novak.
Harbiy rahbarlar bu strategiyani qo‘llab-quvvatlamoqda. Biroq ayrim siyosatchilar Rossiya ichkarisiga zarba berish qaroridan qaytishi mumkin. Germaniya Mudofaa vazirligining sobiq mulozimi Niko Lange harbiy reja va siyosatchilar fikri o‘rtasida tafovut borligini aytdi.
Tarix va hozirgi urushlar shuni ko‘rsatdiki, uzoq muddatli mojarolarda aniq zarba beruvchi qurollar zaxirasi yetarli bo‘lishi shart. NATO qo‘mondonligi dushmanni tiyib turish uchun bu imkoniyatlarni tezroq shakllantirishni rejalashtirmoqda.