“Manchester Siti” Xulian Alvaresni ortga qaytarmoqchi — Marca

“Manchester Siti” Xulian Alvaresni qaytarish niyatida – Marca

Angliyaning “Manchester Siti” klubi yozgi transfer oynasi yakunlanishiga qadar “Atletiko” hujumchisi Xulian Alvaresni ijaraga olish bo‘yicha muzokaralarni boshladi. Marca nashrining xabar berishicha, Enso Mareska boshchiligidagi jamoa Omar Marmush va Savinyoning ketishi natijasida hujum chizig‘ida yuzaga kelgan bo‘shliqni 26 yoshli argentinalik futbolchi bilan to‘ldirishni rejalashtirmoqda.

Dastlabki muloqotlar hozircha jiddiy muzokaralarga aylanmadi. Bunga Madrid klubining qat’iy talabi sabab bo‘lmoqda. “Atletiko” rahbariyati Alvares uchun 150 million yevro to‘lanishini yoki uning o‘rniga munosib hujumchi berilishini talab qilmoqda. O‘z navbatida, “Manchester Siti” bu narxni tushirish maqsadida futbolchini keyinchalik majburiy sotib olish sharti bilan ijaraga olmoqchi. Agar ispanlar ushbu taklifni rad etsa, “shaharliklar” transferdan butunlay voz kechadi.

Ayni paytda Alvaresning o‘zi jamoadan alohida shug‘ullanmoqda. U ketma-ket uchta umumiy mashg‘ulotni o‘tkazib yuborgan. Futbolchi ayni vaqtda “Barselona”ga o‘tishi imkonsiz ekanini tushunib yetgan bo‘lib, uning oldida faqat ikkita variant qoldi: Madridda qolish yoki Angliyaga qaytish.

Madridliklar ustozi Diego Simeone esa hujumchini Ispaniya chempionati doirasidagi “Sevilya”ga qarshi o‘yin qaydnomasiga kiritmadi. Murabbiyning ta’kidlashicha, transfer bozori yopilgach, u futbolchi bilan yana gaplashib ko‘radi va uni asosiy jamoa muhitiga qaytarishga harakat qiladi.

Ma’lumot uchun, Alvares 2022-yildan 2024-yilga qadar “Manchester Siti” sharafini himoya qilgan. U “shaharliklar” safida jami 103 ta o‘yinda maydonga tushib, 36 ta gol va 19 ta assist muallifiga aylangan.