Maktab oʻquvchilaridan boshlangan norozilik Fransiyada ommaviy namoyishlarga aylandi
Fransiyada taʼlimga oid talablar bilan boshlangan norozilik aksiyalariga talabalar, kasaba uyushmalari va fermerlar ham qoʻshildi. 17-oktabrdagi namoyishlarda turli hisoblarga koʻra, 500 mingdan 800 minggacha kishi qatnashgan. Ayrim shaharlarda tartibsizliklar yuz berib, mamlakat boʻylab 2000 dan ortiq kishi ushlangan.
Maktab oʻquvchilarining noroziligi Fransiyada ommaviy namoyishlarga aylanib ketdi
DW xabariga koʻra, Fransiya prezidenti Emmanuel Makron 18-oktabr kechqurun aholiga qilgan murojaatida talonchilik, vayronkorlik va politsiya xodimlariga nisbatan zoʻravonlikni qoraladi.
«Nega fransuzlar Fransiyaga bunday qilmoqda?» — dedi prezident tartibsizliklarda qatnashganlarning xatti-harakatlariga munosabat bildirar ekan. U vayronkorlik va talonchilik qilganlar yetkazilgan zararni qoplashi lozimligini aytdi.
Shu bilan birga, Makron namoyishchilar ko‘tarayotgan muammolar — turmush xarajatlarining oshishi, real ish haqining pasayishi va taʼlim tizimidagi vaziyatga ham to‘xtaldi. U hukumat yaqin kunlarda aholi bilan muloqot qilib, yechimlar ustida ishlashini vaʼda qildi.
«Hech narsa bu zoʻravonlikni oqlamaydi», — deya taʼkidladi Fransiya rahbari.
17-oktabrdagi aksiyalar chogʻida Parijda avtomobillar va oʻnlab doʻkonlarga zarar yetkazildi. Marselda tartibsizlik ishtirokchilari meriya binosiga bostirib kirgan, Lionda esa shahar turistik ofisi binosiga oʻt qoʻyilgan.
Norozilik harakati oʻquv yili boshida maktab oʻquvchilarining chiqishlaridan boshlangan edi. Ular taʼlim tizimini moliyalashtirishni oshirish va oliygohlarga kirish sinovlarini isloh qilishni talab qilgan.
Keyinchalik ularga talabalar, kasaba uyushmalari, fermerlar va «sariq nimchalilar» harakati ishtirokchilari qoʻshilgan. Talablar ham kengayib, Fransiyadagi byudjet inqirozi fonida turmush qimmatlashishiga qarshi norozilik asosiy masalalardan biriga aylangan.