Fransiyada o‘quvchilarning norozilik namoyishlari davom etmoqda, 5000 dan ortiq odam qo‘lga olindi
Fransiyada o‘quvchilarning namoyishlari tinmayapti, ularga ota-onalar va kasaba uyushmalari ham qo‘shildi. Ishtirokchilar o‘qituvchilar yetishmovchiligi, sinflarning haddan tashqari to‘lib ketgani va maktab binolarining holati bilan bog‘liq muammolarni hal etishni talab qilmoqda. 5000 dan ortiq odam qo‘lga olingan.
Fransiyada o‘quvchilar norozilik namoyishlari to‘xtamayapti, 5000 dan ziyod kishi hibsga olindi
Fransiyada maktab o‘quvchilari va talabalar ishtirokidagi norozilik aksiyalari uchinchi haftadir davom etmoqda, deb yozadi BBC News. CNN qayd etishicha, bu mamlakatdagi so‘nggi o‘n yilliklardagi eng yirik talabalar namoyishlaridan biridir.
Dastlabki chiqishlar 21-sentabr kuni Parij yaqinidagi Sent Ekzyuperi litseyida boshlangan edi. Keyinchalik ular barcha hududlarga yoyildi.
Namoyishchilar maktablarni moliyalashtirishni oshirishni talab qilmoqda, shuningdek, o‘qituvchilar yetishmasligi, sinflardagi o‘quvchilar sonining haddan tashqari ko‘pligi hamda ta’mirtalab va eskirgan binolardan norozi ekanini bildirmoqda.
L’Union Étudiante talabalar kasaba uyushmasi ma’lumotiga ko‘ra, aksiyalar Fransiyaning 30 dan ortiq shahrida — Lilldan Marselgacha bo‘lib o‘tmoqda. Ularning ayrimlari tartibsizliklarga va olomonni tarqatish uchun ko‘zni yoshlatuvchi gaz, vodomyot hamda rezina tayoqlardan foydalangan politsiya bilan to‘qnashuvlarga aylangan.
Fransiya Adliya vazirligi ma’lum qilishicha, namoyishlar boshlanganidan beri 5000 dan ortiq odam, asosan voyaga yetmaganlar qo‘lga olingan. To‘qnashuvlar chog‘ida kamida 715 nafar politsiyachi va 215 nafar o‘smir jarohat olgan.
L’Union Étudiante bergan ma’lumotga ko‘ra, 6-oktabr holatiga ko‘ra butun mamlakat bo‘ylab 1800 ta maktab bloklangan yoki yopilgan, universitetlarning 90 foizida esa kirish yo‘llari to‘sib qo‘yilgan. Fransiya hukumati 891 ta maktabda darslar to‘liq yoki qisman to‘xtatilganini bildirmoqda.
Fransiya bosh vaziri Sebasten Lekornyu vazirlarga o‘quvchilar va maktab xodimlari duch kelayotgan muammolarni hal etishga qaratilgan beshta yo‘nalish bo‘yicha ishlashni topshirdi. Ular orasida yetishmayotgan o‘qituvchilar o‘rnini to‘ldirish, maktab darslari jadvalini yaxshilash, maktab binolarini ta’mirlash va modernizatsiya qilish kabi masalalar bor. Ushbu yo‘nalishlar bo‘yicha dastlabki qarorlar oktabr oyi oxirigacha tayyorlanishi kerak.
Fransiya Ta’lim vazirligi 5-oktabr kuni yuqori sinf o‘quvchilari uchun umummilliy so‘rovnoma boshladi. 23-oktabrgacha ular anonim tarzda o‘z muammolari, kutilmalari va ta’lim sifatini yaxshilash bo‘yicha takliflarini bildirishlari mumkin.