Krandan oqayotgan jigarrang suv. Veolia Toshkent aholisining shikoyatlariga izoh berdi
Krandan jigarrang suv kelmoqda. Veolia Toshkent aholisining shikoyatlariga munosabat bildirdi
Bugun, 4 noyabr kuni Toshkent aholisi ijtimoiy tarmoqlarda xonadonlariga kelayotgan jigarrang issiq suv aks etgan foto va videolarni joylashtira boshladi. Veolia Energy Tashkent kompaniyasi suv rangining oʻzgarishi isitish mavsumiga tayyorgarlik bilan bogʻliqligini tushuntirdi.
Xususan, bu muammo Mirzo Ulugʻbek tumani, jumladan Qorasuv, Feruza va Yalangʻach mavzelari aholisiga taʼsir qilishi mumkin. Kompaniya xabariga koʻra, hozirda mutaxassislar magistral tarmoqlarda suv aylanishini sozlamoqda.
Bsim va suv harakatining oʻzgarishi tufayli yoz davomida quvurlar devorlarida toʻplanib qolgan tabiiy choʻkmalar yuvilib ketmoqda. Bu issiq suv rangining vaqtincha oʻzgarishiga va noxush hid paydo boʻlishiga olib kelishi mumkin.
Hozirda Veolia brigadalari magistral tarmoqlarning asosiy tugunlaridagi dimlanib qolgan suvni chiqarib tashlamoqda va quvurlarning alohida uchastkalarini yuvmoqda.
Ushbu muammoga duch kelgan aholiga loyqa suvni mustaqil ravishda oqizib yuborish yoki hisoblagichlar ishiga aralashish tavsiya etilmaydi. Buning oʻrniga kompaniyaning Telegram-boti orqali aniq manzilni — tuman, mavze va uy raqamini yuborish kerak. Murojaatlar dispetcherlarga topshiriladi, shundan soʻng mutaxassislar tashqi tarmoqning tegishli uchastkasini yuvish uchun joyiga joʻnab ketadi.
Veolia vaqtinchalik noqulayliklar uchun uzr soʻradi va tizimning normal ishlashini imkon qadar tezroq tiklash uchun choralar koʻrilayotganini maʼlum qildi.