Kadrlar tayyorlash ish beruvchilarning buyurtmalariga bogʻlanadi
2027/2028 oʻquv yilidan boshlab oliy taʼlim muassasalarida bitiruvchilarni keyinchalik ishga joylashtirish sharti bilan korxonalar buyurtmalari asosida dual taʼlim tizimi joriy etiladi. Talabalar nazariy taʼlimni korxonalardagi amaliyot bilan birlashtiradilar, ish beruvchilar esa subsidiyalar va boshqa qoʻllab-quvvatlash choralarini oladilar.
Kadrlar tayyorlash ish beruvchilarning buyurtmalari bilan bogʻlanadi
Asosiy vazifa — oliy taʼlim muassasalari va ish beruvchilar oʻrtasidagi hamkorlikni mustahkamlash hamda mehnat bozori ehtiyojlarini hisobga olgan holda mutaxassislar tayyorlashni yoʻlga qoʻyishdir.
2027/2028 oʻquv yilidan boshlab dual taʼlim shakliga qabul korxona va tashkilotlarning buyurtmalari asosida amalga oshiriladi. Har yili OTMlar bakalavriat yoʻnalishlari va qabul parametrlarini belgilab, ularni Oliy taʼlim, fan va innovatsiyalar vazirligi bilan kelishib oladilar.
Oʻqishga yoki toʻgʻridan-toʻgʻri korxona yoʻllanmasi boʻyicha, yoki uning buyurtmasi doirasidagi imtihon saralashi natijalariga koʻra kirish mumkin boʻladi. Oʻrta maxsus professional taʼlimning integratsiyalashgan dasturlari boʻyicha tahsil olgan texnikum bitiruvchilari oʻqishni bakalavriatning tegishli yoʻnalishi boʻyicha II yoki III kursdan davom ettirishlari mumkin boʻladi.
Oʻqitish OTM, korxona va talaba oʻrtasidagi uch tomonlama shartnoma asosida tashkil etiladi. Ish beruvchi oʻz byudjetdan tashqari mablagʻlari hisobidan talabaga har oyda kamida 1 Mehnatga haq toʻlashning eng kam miqdori (MHTEKM) miqdorida ish haqi toʻlashi shart. Oʻqishni tamomlagandan soʻng talaba korxonada yoki uning tizimidagi tashkilotlarda kamida ikki yil ishlab berishga majbur.
Oʻquv jarayonining kamida 30 foizini OTMdagi nazariy tayyorgarlik tashkil etadi, qolgan qismi esa korxonada ustoz rahbarligida oʻtadi.
Talabalar uchun qoʻshimcha qoʻllab-quvvatlash choralari koʻzda tutilgan. Xususan, «Muhandislik ishi», «Ishlab chiqarish va ishlov berish», «Arxitektura va qurilish» hamda «Qishloq xoʻjaligi» yoʻnalishlarida tahsil olayotganlar uchun II kursdan boshlab davlat grantining qoʻshimcha kvotalari doirasida oʻqish imkoniyati yaratiladi. Ularning hajmi tegishli davlat buyurtmasi parametrlarining 25 foizini tashkil etadi. Ijtimoiy reyestrga kiritilgan oilalar farzandlari uchun dual shaklda oʻqish I kursdan boshlab Davlat byudjeti mablagʻlari hisobidan moliyalashtiriladi.
2027 yil 1 yanvardan boshlab davlat korxonalarga koʻrsatilgan yoʻnalishlar boʻyicha tahsil olayotgan talabalarning ish haqi xarajatlarining 50 foizini qoplab berishni boshlaydi. Ish beruvchilarga, shuningdek, qabul qilingan talabalar soniga qarab, tadbirkorlik subʼyektlarining barqarorlik reytingida qoʻshimcha ballar va davlat xaridlarida imtiyozlar beriladi.
Bundan tashqari, 2030 yil 1 yanvarga qadar korxonalar tomonidan dual taʼlimning amaliy bazasini yaratish uchun olib kiriladigan asbob-uskunalar va laboratoriya jihozlari uchun bojxona boji stavkasi 1 foiz miqdorida belgilandi.
2027 yil 1 yanvardan boshlab talabalar uchun ustozlarni tayyorlash ham boshlanadi. Bir nafar ustoz koʻpi bilan 15 nafar taʼlim oluvchiga rahbarlik qilishi mumkin boʻladi.
2027/2028 oʻquv yili yakunidan boshlab dual taʼlim ishtirokchisi boʻlgan OTMlar va korxonalarning samaradorlik reytingini yuritish rejalashtirilmoqda. Eng yaxshi uchta OTM va uchta korxona egallagan oʻrniga qarab Davlat byudjeti hisobidan 1, 2 yoki 3 milliard soʻm miqdoridagi mukofotlar bilan ragʻbatlantiriladi.