Janubiy Koreyada O‘zbekistonning to‘rt fuqarosi ushlandi

**Janubiy Koreyada O‘zbekistonning to‘rt fuqarosi qo‘lga olindi**

Janubiy Koreyada O‘zbekistonning to‘rt nafar fuqarosi Suriyada faoliyat yuritayotgan «Katiba at-Tauxid val-Jihod» (KTD) terrorchilik guruhini moliyalashtirish va unga yordam berishda gumon qilinib ushlandi. Bu haqda Yonhap agentligi Kvandju politsiyasiga tayanib xabar berdi.

Tergov maʼlumotlariga ko‘ra, gumonlanuvchilardan biri — 30 yoshlar atrofidagi erkak — 2025 yil aprel oyidan boshlab guruhga 6,3 million von miqdorida kriptovalyuta yuborgan. Bu taxminan 4,6 ming dollarga teng. KTD 2022 yildan beri BMT Xavfsizlik Kengashining sanksiyalar ro‘yxatida turadi.

Tergovchilar, shuningdek, ayni shu davrda erkak guruhdan kriptovalyuta olgan bo‘lishi mumkin, deb gumon qilmoqda. Politsiya taxminiga ko‘ra, u bu mablag‘larga umumiy qiymati 170 million von bo‘lgan 11 ta ishlatilgan avtomobil va ikkita ekskavator xarid qilgan. Keyin bu texnika Suriyaga jo‘natilgan.

Tergov maʼlumotlariga ko‘ra, gumonlanuvchining KTD bilan rasmiy aloqalari bo‘lmagan. Biroq politsiya uning guruh aʼzosi bo‘lgan ukasi u bilan bog‘langanidan keyin KTDga yordam bera boshlaganini aniqlagan.

Erkak Interpolning «qizil bildirishnoma»siga kiritilgach, aprel oyida qo‘lga olingan. Yonhap maʼlumotiga ko‘ra, u ishlatilgan avtomobillarni eksport qilish bilan shug‘ullanuvchi kompaniyaga rahbarlik qilgan.

O‘zbekistonning yana uch nafar fuqarosi ishning asosiy figurantiga ko‘maklashishda gumon qilinmoqda. Xususan, tergov ular unga ishlatilgan avtomobillarni topishda yordam bergan, degan xulosaga kelmoqda.

Politsiyada so‘roq qilingach, uch gumonlanuvchiga qamoqqa olish bilan bog‘liq bo‘lmagan ehtiyot choralari qo‘llangan.

Ish holatlari yuzasidan tergov davom etmoqda.