Hindiston tibbiyot tarmoqlari Oʻzbekistonda klinikalar ochishga intilmoqda
Hindistonning yirik shifoxonalar tarmoqlari, jumladan, Apollo Oʻzbekistonda oʻz klinikalarini ochishga intilmoqda, deb maʼlum qildi sogʻliqni saqlash vaziri Eldor Adilov.
Hindiston tibbiyot tarmoqlari Oʻzbekistonda klinikalar ochishga intilmoqda
Hindistonning yirik shifoxonalar tarmoqlari, jumladan, «Apollo Hospitals» Oʻzbekistonda klinikalar ochishga qiziqish bildirdi, deb xabar berdi sogʻliqni saqlash vaziri Eldor Adilov 2026 yil 30 avgust kuni Hindiston Bosh vaziri Narendra Modining Oʻzbekistonga davlat tashrifi chogʻida jurnalistlarga.
Vazirning soʻzlariga koʻra, Hindiston bilan hamkorlikda 10 dan ortiq qoʻshma loyiha amalga oshirilmoqda, Hindiston delegatsiyasining tashrifi davomida esa yana beshta istiqbolli tashabbusni boshlash rejalashtirilgan edi. Ushbu loyihalarning aksariyati farmatsevtika sanoatiga, xususan, Oʻzbekistonda dori vositalarini mahalliy ishlab chiqarish va mahalliylashtirishga qaratilgan.
Yangi loyihalarni Toshkent shahrida, shuningdek, viloyatlarda ham amalga oshirish koʻzda tutilgan. Tashrif davomida tomonlar Andijon va Surxondaryo viloyatlaridagi muayyan tashabbuslar boʻyicha muzokaralar olib borishdi.
Ikki tomonlama hamkorlikning yana bir muhim yoʻnalishi sogʻliqni saqlash infratuzilmasini rijvojlantirish hisoblanadi. Adilovning taʼkidlashicha, Hindistonning yetakchi tibbiyot provayderlari, jumladan, «Apollo» Oʻzbekistonda tibbiyot muassasalarini tashkil etish istagini bildirgan.
Vazir Hindiston bilan tibbiy hamkorlikning asosiy yoʻnalishlari sifatida onkologiya va kardiologiyani tilga oldi. Farmatsevtika sohasida onkologik dori vositalarini ishlab chiqarish va mahalliylashtirishga ixtisoslashgan «Ankavel» korxonasini ishga tushirish rejalashtirilgan.
Adilov, shuningdek, onkologik kasalliklarni davolashning ilgʻor usuli boʻlgan proton terapiyasini hamkorlikning istiqbolli yoʻnalishi sifatida qayd etdi. Uning soʻzlariga koʻra, ushbu texnologiya Hindistonda allaqachon qoʻllanilmoqda va Oʻzbekistonning uzoq muddatli rejalariga kiritilgan, garchi uni joriy etish loyihaning hozirgi bosqichiga kiritilmagan boʻlsa-da.
Davlat tashrifi davomida ikki davlat oʻrtasida Ayurveda va boshqa anʼanaviy tibbiyot amaliyotlari sohasida hamkorlik toʻgʻrisidagi anglashuv memorandumi ham imzolandi.