Havo, quruqlik va dengizni kuzatadi: Shvetsiya uchun ilk GlobalEye namoyish etildi
Saab kompaniyasi Shvetsiya Harbiy-havo kuchlari uchun buyurtma qilingan birinchi GlobalEye uzoq masofali radiolokatsion aniqlash va boshqaruv samolyotini namoyish etdi. Mamlakat jami uchta shunday samolyot xarid qilishni rejalashtirgan.
Havo, quruqlik va dengizni kuzatadi: Shvetsiya uchun birinchi GlobalEye taqdim etildi
Yangi samolyot hali buyurtmachiga topshirilgani yoʻq. U avval tekshiruv va sinovlardan oʻtishi, soʻng ilk parvozini bajarishi kerak. Shundan keyin uni Shvetsiyaga yetkazish rejalashtirilgan.
GlobalEye uzoq masofadan radiolokatsion kuzatuv, nishonlarni aniqlash va harbiy harakatlarni muvofiqlashtirish imkoniyatlarini birlashtiradi. Tizim havo, quruqlik va dengizdagi vaziyat haqida maʼlumot yigʻib, qoʻmondonlikka umumiy manzarani koʻrishga yordam beradi.
Samolyot katta hududlardagi faollikni aniqlash va kuzatish uchun moʻljallangan. Undan olinadigan maʼlumot tahdidlarga oʻz vaqtida javob berish, operatsiyalarni rejalashtirish va kuchlar harakatini muvofiqlashtirishda ishlatiladi.
Shvetsiya ushbu samolyotlar orqali milliy havo hududi va unga tutash dengiz yoʻnalishlarida kuzatuv imkoniyatlarini kuchaytirishni maqsad qilgan.
AviTrader xabariga koʻra, Shvetsiya Mudofaa taʼminoti boshqarmasi Saab bilan dastlabki shartnomani 2022-yilda imzolagan. Unda ikkita GlobalEye yetkazib berish va keyinchalik qoʻshimcha samolyotlarga buyurtma berish imkoniyati koʻzda tutilgan.
2024-yilda uchinchi samolyot ham buyurtma qilingan. Shu bilan Shvetsiya uchun tayyorlanadigan GlobalEye’lar soni uchtaga yetgan.