Germaniyadagi mashg‘ulotlar paytida 80 ga yaqin ukrainalik harbiy qochib ketdi

Germaniyada mashg‘ulot o‘tayotgan 80 ga yaqin ukrainalik harbiy xizmatchi o‘quv mashg‘ulotlari yakunlangach, harbiy qismga qaytmagan. Bu haqda Die Zeit nashri o‘tkazgan surishtiruvda ma’lum bo‘ldi.

Saksoniya-Anxalt yerining o‘zida 80 ga yaqin dezertirlik holati qayd etilgan bo‘lib, butun Germaniya bo‘yicha bu ko‘rsatkich yuzlab harbiylarni tashkil etishi mumkin.

2022-yildan buyon 29 mingga yaqin ukrainalik harbiy Germaniyadagi 60 ga yaqin obyektda o‘q otish, niqoblanish, birinchi yordam ko‘rsatish va boshqa boshlang‘ich ko‘nikmalarni o‘rgangan. Germaniya Mudofaa vazirligi ayrim harbiylarning mashg‘ulot joylarini “o‘zboshimchalik bilan tark etgani”ni tasdiqlagan, ammo butun mamlakat bo‘yicha umumiy statistika yuritilmaydi.

Ukraina qonunchiligiga ko‘ra, harbiy qismni o‘zboshimchalik bilan tark etish dezertirlik hisoblanadi va bu qilmish uchun qamoq jazosi berilishi mumkin. Biroq qochgan harbiylarning Ukraina sudida javob berishi ehtimoli past. Shu bilan birga, ular Germaniyada ukrainalik qochqinlar uchun beriladigan soddalashtirilgan maqomga avtomatik ravishda ega bo‘la olmaydi, chunki ular mamlakatga urushdan qochgan tinch aholi vakili sifatida kelmagan.

Ularning ayrimlari boshpana olish tartibi orqali Germaniyada qolishga urinishi mumkin. Buning uchun ular Ukrainaga qaytgach, o‘zlariga xavf yoki ta’qib tahdid solishini isbotlashi kerak. Die Zeit nashrining yozishicha, boshpana olish imkoniyati past baholanmoqda, lekin bu jarayonning o‘zi bir yil yoki undan ko‘proq vaqt davom etishi mumkin.