Germaniya Ukrainaga urush boshidan buyon qancha yordam ko‘rsatgani ma’lum qilindi

Germaniya Ukrainaga urush boshlanganidan beri qancha yordam bergani ma’lum qilindi.

Rossiyaning keng ko‘lamli bosqini boshlanganidan buyon Germaniya Ukrainaga 65 milliard yevrodan ortiq yordam ko‘rsatgan. Bu haqda Ukraina tashqi ishlar vaziri Andriy Sibiga Kiyevda germaniyalik hamkasbi Yoxann Vadeful bilan o‘tkazilgan qo‘shma matbuot anjumanida ma’lum qildi.

Sibiganing ta’kidlashicha, Germaniya Ukraina uchun xavfsizlik, mudofaa sanoati va urushdan keyingi tiklanish masalalarida asosiy hamkorlardan biri bo‘lib qolmoqda. Uning so‘zlariga ko‘ra, Germaniya Ukraina hududida mudofaa sohasiga ixtisoslashgan qo‘shma ishlab chiqarishni yo‘lga qo‘ygan birinchi davlatdir. Hozirda ikki mamlakat, xususan, zamonaviy qurol-yarog‘ va dronlar ishlab chiqarish bo‘yicha hamkorlikni kengaytirmoqda.

“Ukraina Germaniya uchun nafaqat xavfsizlik sohasida, balki strategik iqtisodiy hamkor sifatida ham muhim. Ishonchim komilki, bu hamkorlik faqat kengayib boradi”, dedi Sibiga.

Ukraina tashqi ishlar vaziri Berlin mudofaa sohasidagi yordamini davom ettirishiga, o‘z mamlakatining Yevropa Ittifoqiga a’zoligini qo‘llab-quvvatlashiga hamda Rossiyaning muzlatilgan aktivlaridan Ukrainani tiklash uchun foydalanish tashabbusini dastaklashiga umid bildirdi.

“Germaniya yordam ko‘rsatishda birinchi o‘rinda. Biz buni qadrlaymiz”, dedi Sibiga. Uning so‘zlariga ko‘ra, Kiyev Germaniyadan xavfsizlik sohasi, mudofaa sanoatini rivojlantirish, Ukrainaning Yevropa Ittifoqiga qo‘shilishi bo‘yicha muzokaralarni ilgari surish va muzlatilgan Rossiya aktivlari masalasida keyingi yordamni kutmoqda.

Matbuot anjumani oldidan Sibiga va Vadeful halok bo‘lgan ukrainaliklar xotirasini yod etish uchun Mustaqillik maydonida o‘tkazilgan umumxalq sukut saqlash marosimida ishtirok etishdi.