“Garri Potter” yulduzi Deniel Redkliff franshizaga qaytishi mumkin
“Garri Potter” yulduzi Deniel Redkliff franshizaga qaytishi mumkin
Butun dunyoga “omon qolgan bola” obrazi bilan tanilgan Daniel Redkliff franshizaga kutilmagan rolda qaytishi ehtimoli bor. Bu haqda Peopletalk xabar bermoqda.
Insayderlar ma’lumotiga ko‘ra, aktyor HBO bilan “Garri Potter” kinosagasining serial ko‘rinishidagi remeykida Volan-de-Mort rolini ijro etish yuzasidan muzokaralar olib bormoqda.
Aytishlaricha, tomonlar shartnoma imzolashga juda yaqin, biroq HBO studiyasi hozircha bu kasting bo‘yicha rasmiy izoh bermagan. Agar kelishuv amalga oshsa, bu shubhasiz fentezi olamidagi eng muhim voqealardan biriga aylanadi. Original filmlarda o‘n yil davomida bosh qahramonni gavdalantirgan Redkliff endi uning eng ashaddiy dushmani sifatida ko‘rinish beradi. Yovuz qahramonning yoshligini esa 13 yoshli Billi Barratt ijro etadi.
Franshiza asosida suratga olinayotgan yangi serialning birinchi mavsumi premyerasi 2026-yil dekabriga belgilangan. Ikkinchi mavsum ustidagi ishlar esa shu yil kuzida boshlanadi. HBO yozuvchi Joan Roulingning barcha 7 ta kitobini to‘liq ekranlashtirishni rejalashtirgan.