Fundamental fanlar oʻqituvchilariga yangi ragʻbatlar va mukofotlar vaʼda qilinmoqda
Prezident maʼrifatparvar Mahmudxoʻja Behbudiyning «Maktab — taraqqiyot boshlanishi, madaniyat va farovonlik darvozasidir» degan soʻzlarini eslatib oʻtdi. Oʻgʻil-qizlarimiz uchun bu darvozani kengroq ochish, ularning isteʼdodlarini roʻyobga chiqarish — Uchinchi Renessans gʻoyasining asosiy magʻzidir.
Fundamental fanlar oʻqituvchilariga yangi ragʻbat va mukofotlar vaʼda qilindi
Sunʼiy intellekt va raqamli texnologiyalar rivojlanishi bilan yangi kasblar paydo boʻlmoqda, mavjudlari esa boshqa koʻnikmalarni talab qilmoqda. Shu bois, maktab bitiruvchisi til va kasbni egallamasdan turib katta hayotga qadam qoʻymasligi kerak.
— Bolani maktabdan kasbsiz va tilsiz chiqarish — uning kelajagiga befarqlik emasmi? — dedi prezident.
Direktorlar oʻquvchilar qaysi til va qaysi kasbni oʻrganayotgani, bitirish vaqtiga kelib qanday koʻnikmalarga ega boʻlishi haqida jiddiy oʻylashlari kerakligi taʼkidlandi.
Maktab rahbarlariga zarur vakolatlar beriladi, hamkorlikka tayyor tadbirkorlar uchun esa sharoitlar yaratiladi. Yoshlarni maktab partasidan boshlab kasbga tayyorlash va taʼlim bosqichlari uzviyligini taʼminlash uchun komissiya tuziladi; uch oy muddatda yangi qarorlar eʼlon qilinadi.
Iqtisodiyot oʻsishning texnologik va innovatsion modeliga oʻtishi uchun bolalar matematika, fizika, kimyo va biologiya fanlarini maktabdayoq chuqur oʻrganishlari lozim. Shu maqsadda, agar sinfda 25 nafardan ortiq oʻquvchi boʻlsa, ushbu fanlar ikki guruhga boʻlib oʻqitiladi.
Fundamental fanlar oʻqituvchilari uchun yangi ragʻbatlantirish tizimi joriy etilmoqda. Milliy sertifikatga ega pedagoglarga 50 foizlik ustama toʻlanadi, tuman va shaharlardagi 208 nafar yetakchi oʻqituvchi esa har yili 30 million soʻmdan mukofot oladi. Yana 1 ming nafar oʻqituvchi xorijda stajirovka oʻtaydi.
Kamida 15 yil ish stajiga ega pedagoglarning farzandlariga oliy oʻquv yurtidagi kontrakt uchun foizsiz kredit ajratiladi. Chet el va milliy sertifikat olgan oʻqituvchilarning imtihon xarajatlari toʻliq qoplab beriladi.
Xorazmiy, Fargʻoniy, Beruniy, Ibn Sino va Mendeleyev nomidagi xalqaro va mintaqaviy olimpiadalar gʻoliblarini tayyorlagan pedagoglarga toʻgʻridan-toʻgʻri oliy toifa beriladi. Prezident ushbu tashabbuslar qariyb 100 ming nafar oʻqituvchi uchun munosib ragʻbat boʻlishiga ishonch bildirdi.