Avgustda mingta rejalashtirilgan shaxsiy qabul o‘tkazilmadi

Avgust oyida mingta rejalashtirilgan shaxsiy qabul amalga oshirilmagan

Prezident Xalq qabulxonasi tizimida 2026-yil avgust oyida 83 019 ta masala bo‘yicha 76 196 ta murojaat ro‘yxatga olindi.

Murojaatlarning 11 114 tasi takroriy, 1 593 tasi esa jamoaviy xarakterga ega bo‘lgan.

Eng ko‘p murojaatlar bola nafaqasi bo‘yicha — 4 833 ta, aliment masalasida — 4 658 ta va gaz balloni bo‘yicha — 2 475 ta kelib tushgan. Bundan tashqari, huquqbuzarlikka oid 1 826 ta, bir martalik moddiy yordam yuzasidan 1 765 ta, surishtiruv va tergov masalalarida 1 709 ta murojaat qayd etilgan.

Ish bilan ta’minlash bo‘yicha 1 657 ta, uy-joyni ta‘mirlashga moddiy yordam bo‘yicha 1 548 ta, ichki yo‘llarni ta’mirlash yuzasidan 1 528 ta hamda ijro hujjatlariga oid 1 234 ta murojaat kelib tushgan.

Tashkilotlar orasida eng ko‘p murojaat Ijtimoiy himoya milliy agentligiga — 12 097 ta kelib tushgan. Keyingi o‘rinlarda Ichki ishlar vazirligi — 8 258 ta, Majburiy ijro byurosi — 7 966 ta, Energetika vazirligi — 6 551 ta va Bosh prokuratura — 5 498 ta qayd etilgan.

Shuningdek, Bandlik vazirligiga 4 272 ta, Sog‘liqni saqlash vazirligiga 3 934 ta, Oliy sudga 3 070 ta, Maktabgacha va maktab ta‘limi vazirligiga 2 916 ta hamda Markaziy bankka 2 615 ta murojaat kelib tushgan.

Shoshilinch murojaatlarning 638 tasi elektr uzilishlari, 551 tasi ichimlik suvi, 67 tasi esa tez tibbiy yordam xizmati bilan bog‘liq bo‘lgan.

Avgust oyida 5 666 ta shaxsiy qabul rejalashtirilgan bo‘lib, amalda 4 666 tasi o‘tkazilgan. O‘tkazilmagan shaxsiy qabullar soni Toshkent viloyatida 148 ta, Farg‘ona viloyatida 137 ta va Toshkent shahrida 134 tani tashkil etgan.

Shuningdek, 4 495 ta sayyor qabul rejalashtirilgan bo‘lib, shundan 4 327 tasi o‘tkazilgan. Sayyor qabul o‘tkazmagan tashkilotlar orasida elektr tarmoqlari korxonalarida 39 ta, obodonlashtirish boshqarmalarida 36 ta va mahallalar bo‘limlarida 31 ta holat qayd etilgan.