AQShga parvoz qiluvchilarga Kongodagi epidemiya sababli yangi talab qo‘yildi
3-noyabrdan AQShga uchayotganlar uchun sog‘liq deklaratsiyasini to‘ldirish majburiy bo‘ladi. Bu Kongoda 4,6 mingdan ortiq kishining o‘limiga sabab bo‘lgan virus bilan bog‘liq. Yo‘lovchi so‘nggi 21 kunda Kongoda bo‘lmaganini tasdiqlashi shart. Kongo aeroporti orqali tranzit o‘tish ham mamlakatda bo‘lganlik deb baholanadi.
AQShga uchuvchilarga Kongodagi epidemiya sabab yangi talab joriy etildi
3-noyabrdan boshlab xorijdan AQShga uchayotgan barcha yo‘lovchilar, jumladan tranzit orqali ketayotganlar ham maxsus sog‘liqni saqlash deklaratsiyasini to‘ldirishi majburiy etib belgilandi. Bu haqda AQSh Kasalliklarni nazorat qilish va oldini olish markazlari (CDC) ma’lum qildi.
Yangi tartibga ko‘ra, har bir yo‘lovchi so‘nggi 21 kun ichida Kongo Demokratik Respublikasida (KDR) bo‘lmaganini rasman tasdiqlashi kerak. Talablarga amal qilmaganlar samolyotga kiritilmasligi, keyingi parvozlardan cheklanishi hamda jinoiy javobgarlikka tortilishi mumkin.
Jahon sog‘liqni saqlash tashkiloti ma’lumotiga ko‘ra, Kongo DRda Bundibugio virusi tarqalishi davom etmoqda. 20-oktabr holatiga ko‘ra, mamlakatda jami 9704 ta yuqtirish holati va 4687 ta o‘lim (o‘lim darajasi — 48,3%) qayd etilgan.
Virus mintaqa bo‘ylab ham kengaymoqda: Keniyada 9 ta holat (1 ta o‘lim) aniqlangan bo‘lsa, Nigeriyada kasallik boshqa mamlakatdan kirib kelgan 1 kishida topilgan. JSST kasallikka chalingan mamlakatlar bilan savdo yoki sayohatga cheklovlar kiritmaslikni tavsiya qilmoqda.