JSST: Ugandada Ebola epidemiyasi yakunlandi, Kongo DRda esa kasallanganlar soni ortmoqda

JSST: Ugandada Ebola epidemiyasi tugadi, ammo Kongo DRda kasallik avj olmoqda

Jahon sog‘liqni saqlash tashkiloti (JSST) Ugandada Ebola virusining Bundibugyo shtammi bilan bog‘liq epidemiya nihoyasiga yetganini e’lon qildi.

Mamlakatda jami 20 kishida ushbu kasallik aniqlangan bo‘lib, ulardan 2 nafari vafot etgan. Uganda hukumati 28-iyul kuni mamlakatni Ebola epidemiyasidan xoli deb e’lon qilgan edi, JSST esa kasallik yuqish zanjirlari butunlay uzilganiga ishonch hosil qilish maqsadida vaziyatni shu haftagacha kuzatib bordi.

Biroq, qo‘shni Kongo Demokratik Respublikasida (Kongo DR) vaziyat murakkabligicha qolmoqda. JSST Afrika mintaqasi favqulodda vaziyatlarga tayyorgarlik bo‘yicha direktori Mari Rozlin Belizerning ta’kidlashicha, mamlakatda Ebola bilan kasallanish holatlari o‘sishda davom etmoqda va epidemiya nazorat qilish imkoniyatlaridan tezroq tarqalmoqda.

Kongo hukumati ma’lumotlariga ko‘ra, 25-avgust holatiga ko‘ra, mamlakatda 5 600 dan ortiq kasallanish va 2 700 dan ziyod o‘lim qayd etilgan. JSST vakili Kongo hududida virus yuqishi hali ham faol ekanini, biroq kontaktlarni aniqlash va test o‘tkazish ishlari yaxshilanayotganini bildirdi.

Tahlillar shuni ko‘rsatdiki, Bundibugyo virusida uning tez tarqalishiga sabab bo‘ladigan mutatsiya belgilari aniqlanmagan. Shu bilan birga, JSST eng ko‘p zarar ko‘rgan hududlarga tibbiy vositalar va shaxsiy himoya anjomlarini yetkazish uchun zudlik bilan 30 million dollar mablag‘ yetishmayotganini ma’lum qildi.

24-avgust holatiga ko‘ra, kasallik oqibatida 2,5 mingdan ortiq odam vafot etgan, epidemiya esa mamlakat tarixidagi eng yirik Ebola epidemiyasiga aylangan. Tibbiyot xodimlari orasida ham 160 ga yaqin kasallanish va 43 ta o‘lim qayd etilgan.