AQShda yoʻldagi bezorilik oqibatida qotillik sodir etgan shaxsga nisbatan chiqarilgan hukm sudda jabrlanuvchining SI (sunʼiy intellekt) orqali yaratilgan videosi koʻrsatilgani sababli bekor qilindi
Arizona apellyatsiya sudi vafot etgan qurbonning SI (sunʼiy intellekt) orqali yaratilgan murojaatini efirga uzatish "oʻsha chegaradan chiqib ketgani" haqida qaror chiqardi.
Arizona shtatida yoʻldagi janjal ortidan qotillik sodir etgan shaxsga nisbatan jazo chorasi qayta koʻrib chiqiladi. Bunga apellyatsiya sudi tomonidan sud zalida halok boʻlgan jabrlanuvchining sunʼiy intellekt (SI) yordamida yaratilgan videomurojaati nooʻrin namoyish etilgan deb topilgani sabab boʻldi.
Gabriel Paul Orkasitas 2021 yilda svetoforning qizil chirogʻida yuz bergan toʻqnashuv paytida 37 yoshli Kristofer Pelkini otib oʻldirganlikda aybdor deb topilgan edi. U 10 yillik qamoq jazosiga hukm qilingandi.
Uning himoyachilari oʻtgan yilgi hukm oʻqilishidan oldin sud zalida Pelkining oilasi tomonidan SI yordamida yaratilgan videoning namoyish etilishiga raislik qiluvchi sudya yoʻl qoʻymasligi kerak edi, deya apellyatsiya berdi.
Arizona apellyatsiya sudi bu fikrga qoʻshildi va 55 yoshli Orkasitasga nisbatan jazo chorasi qayta koʻrib chiqilishi kerakligini bildirdi, chunki SI orqali yaratilgan videorolik «chegaradan chiqib ketgan».
«Biror voqeani hujjatlashtirish yoki muayyan lahzani yozib olish oʻrniga, SI videosi jabrlanuvchining singlisi tasavvurlari asosida yaratilgan jabrlanuvchining qiyofasi va uning fikrlarini taqdim etadi», deb yozdi apellyatsiya sudi chorshanba kuni.
Pelkining singlisi Steysi Uels oʻtgan yili BBC’ga bergan intervyusida oila aʼzolari SI videosi uchun uning qiyofasini qayta tiklash maqsadida ovoz yozuvlari, video va fotosuratlardan foydalanganini aytgan edi.
«Meni otib oʻldirgan odam — Gabriel Orkasitasga aytadiganim: oʻsha kuni shunday vaziyatda toʻqnash kelganimiz afsuslanarli», degan edi Pelkining SI talqini 2025 yilda sud zalida. «Boshqa hayotda, ehtimol, doʻst boʻlishimiz mumkin edi».
«Men kechirimlilikka va kechiruvchi Xudoga ishonaman. Hamisha ishonganman va hozir ham ishonaman», deya davom etgan boshiga kulrang beysbolka kiygan Pelkining SI talqini.
Hukm chiqarish vaqtida ish boʻyicha sudya Todd Leng SIdan foydalanishni olqishlagan edi.
«Menga ushbu SI videosi juda maʼqul keldi, buning uchun rahmat. Siz qanchalik gʻazabda boʻlmang, oilaning gʻazabi qanchalik asosli boʻlmang, men kechirimlilikni eshitdim», degan edi sudya Leng. «Bu samimiy boʻlganini his qilyapman».