AQShda 11 sentyabr terrorchilik xurujlarida ayblanayotganlarga yana oʻlim jazosi xavf solishi mumkin
AQShda 11 sentyabrdagi teraktlar boʻyicha ayblanuvchilarga yana oʻlim jazosi xavf solishi mumkin
AQSh Oliy sudi 2001 yil 11 sentyabrdagi teraktlarda ayblanayotganlar bilan tuzilgan va ularga oʻlim jazosidan qochish imkonini bergan kelishuvlarni bekor qilish haqidagi qarorni qayta koʻrib chiqishni rad etdi. Endilikda, agar sud ularni aybdor deb topsa, ish boʻyicha uch nafar ayblanuvchiga yana oliy jazo tayinlanishi mumkin.
Gap Amerika rasmiylari tomonidan teraktlar tashkilotchisi deb hisoblanadigan Xolid Shayx Muhammad, shuningdek, Mustafo al-Havsaviy va Valid bin Attash haqida bormoqda. 2024 yilda ular oʻlim jazosidan voz kechish evaziga aybini tan olish boʻyicha kelishuv tuzgan edilar. Biroq bu kelishuvlar uzoq davom etmadi.
2024 yil avgust oyida AQShning oʻshandagi mudofaa vaziri Lloyd Ostin respublikachi qonun chiqaruvchilarning tanqidlari fonida ularni bekor qildi. Himoya tomoni vazirning kelishuvlarni bekor qilishga haqqi yoʻqligini aytib, ushbu qaror ustidan shikoyat qildi.
2025 yil iyul oyida apellyatsiya sudi Ostin oʻz vakolatlari doirasida harakat qilgan degan qarorga keldi. Ayblanuvchilar ushbu qaror ustidan Oliy sudga shikoyat qilishga urindilar, ammo u arizalarni koʻrib chiqishni rad etdi. Shu tariqa, kelishuvlarni bekor qilish haqidagi qaror oʻz kuchida qolmoqda.
Ish Kubadagi Guantanamo Amerika bazasidagi harbiy sudda koʻrilmoqda va teraktlar bilan bogʻliq eng uzoq davom etayotgan jarayonlardan biri boʻlib qolmoqda. Sud surishtiruvini, xususan, ayblanuvchilar MRBning maxfiy qamoqxonalarida qiynoqqa solinganidan keyin olingan dalillarning maqbulligi boʻyicha bahslar qiyinlashtirmoqda.
Sud jarayonining boshlanishi 2028 yil iyun oyiga belgilangan. Ayblov hukmi chiqarilgan taqdirda, Muhammad, al-Havsaviy va bin Attashga oʻlim jazosi xavf solishi mumkin.
2001 yil 11 sentyabrdagi teraktlar deyarli uch ming kishining yostigʻini quritgan.