11-sentyabr teraktini rejalashtirgan shaxs chorak asrdan so‘ng, 2028-yilda sud qilinadi
**11-sentyabr teraktini rejalashtirgan shaxs ustidan sud 2028-yilda bo‘lib o‘tadi**
2001-yil 11-sentyabr teraktlarini tashkillashtirishda ayblanayotgan asosiy shaxs ustidan sud majlisi uzoq davom etgan kechikishlar va huquqiy nizolardan so‘ng nihoyat 2028-yilning yoziga belgilandi. AQSH harbiy sudyasi Xolid Shayx Muhammad va yana uch nafar sudlanuvchi bo‘yicha sud jarayonining yangi sanasini e'lon qildi.
Sud jarayoni 2028-yil 5-iyun kuni boshlanishi rejalashtirilgan. Bu prokurorlar dastlab so‘ragan 2027-yil yanvar oyidan 18 oyga kechroq muddatdir. AQSH Harbiy-havo kuchlari sudyasining qaroriga ko‘ra, qo‘shimcha vaqt sudgacha bo‘lgan nizolarni, jumladan, qanday dalillarni ko‘rsatish mumkinligi bo‘yicha kelishmovchiliklarni hal qilish uchun zarur.
Yigirma yildan ortiq vaqt davomida AQSH harbiylari va ketma-ket almashgan AQSH maʼmuriyatlari bu qonli hujum tashkilotchisini javobgarlikka tortishga urinib kelmoqda.
2028-yilgi sud sanasi belgilangan muddatlar va bosqichlar bajarilishiga bog‘liq bo‘lib, bu sudning yana kechikishi mumkinligini anglatadi. Avvalroq sud majlisi 2021-yilga belgilangan, ammo keyinchalik bekor qilingan edi.
**11-sentyabr hujumlari tashkilotchisi**
Xolid Shayx Muhammad samolyotlarni olib qochib, ularni Jahon savdo markazi minoralari hamda Pentagonga urish rejasini tuzganlikda va boshqarganlikda ayblanmoqda. Boshqa bir samolyot Pensilvaniyadagi dalaga qulagan edi. Bu hujumlarda 3000 ga yaqin odam halok bo‘lgan.
U o‘zi bilan til biriktirishda ayblanayotgan boshqa uch sudlanuvchi bilan birga sud qilinadi. To‘rt sudlanuvchi Kubadagi Gvantanamo bazasida ushlab turilgan so‘nggi mahbuslar qatoriga kiradi.
Pokistonda tug‘ilgan Shayx Muhammad AQSH hokimiyati uni 2003-yil mart oyida Pokistonda hibsga olgunga qadar “Al-Qoida” yetakchisi Usama bin Ladenning asosiy yordamchilaridan biri bo‘lgan.
2025-yilda federal apellyatsiya sudi Shayx Muhammadga aybini tan olish evaziga qatl etilish xavfidan qutilish imkonini beradigan kelishuvni bekor qildi. Bu kelishuv Muhammad va uning ikki sherigi uchun umrbod qamoq jazosini nazarda tutgan edi.
Shuningdek, kelishuv sudlanuvchilardan qurbonlarning oilalarini qiziqtirgan barcha savollarga javob berishni talab qilgan. Biroq ikki yillik muzokaralardan so‘ng erishilgan bu bitimdan sobiq AQSH prezidenti Jo Bayden maʼmuriyati voz kechgan edi.