AQSH Eronning dunyodagi moliyaviy aloqalariga qarshi hujum boshlaganini eʼlon qildi
AQSH Eronga qarshi «iqtisodiy quvgʻin» boshladi. Vashington Tehronni moliyalashtiruvchi barcha daromad manbalarini toʻsish va Eron bilan hamkorlik qilayotgan davlatlarga qarshi choralar koʻrishni rejalashtirmoqda.
AQSH Eronning butun dunyodagi moliyaviy aloqalariga qarshi hujum boshlaganini maʼlum qildi.
AQSH Moliya vazirligi Eron Islom Respublikasiga qarshi misli koʻrilmagan "Iqtisodiy quvgʻin" amaliyotini boshladi, deya eʼlon qildi idora rahbari Skott Bessent matbuot anjumanida.
Uning soʻzlariga koʻra, bu choralar bevosita Tehronga va Eron hukumatini qoʻllab-quvvatlayotgan har qanday davlatga qaratiladi.
"AQSH Moliya vazirligi Eron va unga yordam berayotganlarga qarshi misli koʻrilmagan "Iqtisodiy quvgʻin" amaliyotini boshladi... Biz Eronning butun dunyodagi moliyaviy aloqalariga qarshi iqtisodiy hujumga oʻtmoqdamiz", - dedi u.
Bessentning taʼkidlashicha, Vashingtonning maqsadi Erondagi hokimiyatni taʼminlab turgan barcha iqtisodiy aloqalarni uzishdan iborat. U AQSH "sirtmoqni siqishi" va Islom inqilobi qoʻriqchilari korpusini (IIQK) moliyalashtiradigan barcha ehtimoliy daromad manbalarini toʻsishini maʼlum qildi. "Biz "nol sizib chiqish" tamoyiliga amal qilamiz", - deb taʼkidladi u.
AQSH prezidenti Donald Tramp jahon yetakchilariga qoʻngʻiroq qilib, ulardan Eron bilan hamkorlikni toʻxtatishni soʻramoqda, deb qoʻshimcha qildi Bessent. AQSH moliya vazirining qayd etishicha, Tehron nomidan pul yuvishga koʻmaklashadigan har qanday tashkilot Amerika dollar tizimidan chiqarib yuboriladi.
Bundan bir kun avval Bessent The Financial Times nashrida eʼlon qilingan maqolasida AQSH Eronning harbiy salohiyatini allaqachon zaiflashtirganini, endi esa Vashington Eron iqtisodiyoti uchun "Qiyomat kuni"ni ("D kuni") taʼminlashini yozgan edi. "Tongda iqtisodiy "Qiyomat kuni" - dushmanga qarshi uyushtirilgan eng yirik moliyaviy hujum boshlanadi", - deb yozdi moliya vaziri.
20-avgust kuni prezident Donald Tramp Eronga qarshi "eng halokatli iqtisodiy amaliyot" boshlanganini eʼlon qildi. Oʻshanda u "bugundan boshlab Eronga yordam koʻrsatadigan har qanday mamlakat ulkan iqtisodiy oqibatlarga duch kelishini" yozgan edi.
Bundan bir kun avval CNN amerikalik rasmiyga tayanib, Tramp muzokaralarni davom ettirishdan voz kechib, Tehronga bosimni bosqichma-bosqich kuchaytirishga eʼtibor qaratgan holda Eronga nisbatan yondashuvini oʻzgartirgani haqida xabar bergan edi.