Tramp Eronga qarshi keng ko‘lamli iqtisodiy urush e’lon qildi
AQSh prezidenti Donald Tramp Eronga qarshi misli ko‘rilmagan ko‘lamdagi iqtisodiy bosim kampaniyasi boshlanganini ma’lum qildi. U Tehronni qo‘llab-quvvatlaydigan yoki Eron bilan savdo va boshqa biznes aloqalarini davom ettiradigan har qanday davlatni «ulkan» sanksiyalar bilan ogohlantirdi.
**Tramp Eronga qarshi misli ko‘rilmagan iqtisodiy urush e’lon qildi**
AQSh prezidenti Donald Tramp 20-avgust, payshanba kuni Eron Islom Respublikasiga qarshi keng ko‘lamli iqtisodiy operatsiya boshlanganini ma’lum qildi. Bu haqda u o‘zining Truth Social ijtimoiy tarmog‘idagi sahifasida yozdi.
Trampning ta’kidlashicha, bu "biror davlatga qarshi qachondir amalga oshirilgan eng vayronkor iqtisodiy operatsiya" bo‘lib, "misli ko‘rilmagan ko‘lamdagi iqtisodiy urush va izolyatsiya"ni anglatadi.
AQSh rahbari, shuningdek, Eronni qo‘llab-quvvatlaydigan yoki u bilan iqtisodiy hamkorlikni davom ettiradigan davlatlarga nisbatan qat’iy choralar ko‘rilishini bildirdi. Uning so‘zlariga ko‘ra, bunday mamlakatlar "ulkan" sanksiyalarga duch kelishi mumkin.
Tramp Vashingtonning ittifoqchilarini ham Tehronga qarshi iqtisodiy bosim kampaniyasiga qo‘shilishga chaqirdi. "Eron tahdidini yakkalash va uni yengish uchun barcha ittifoqchilarimizning qo‘llab-quvvatlashi kerak", - dedi AQSh prezidenti.
AQSh avvalroq ham Eron iqtisodiyotining muhim tarmoqlariga, xususan, neft sanoati, dengiz orqali yuk tashish va moliya sektorlariga qarshi keng qamrovli sanksiyalar joriy etgan edi. Vashingtonning asosiy maqsadlaridan biri Tehronning energiya resurslari eksportidan oladigan daromadlarini keskin qisqartirish hisoblanadi.
Tramp e’lon qilgan yangi choralar AQSh aprel oyi boshida ma’lum qilgan "Iqtisodiy g‘azab" operatsiyasi doirasidagi bosim kampaniyasining davomi bo‘lishi mumkin.
Ayni paytda Eron bilan iqtisodiy aloqalarni cheklash bo‘yicha ayrim davlatlar ham chora ko‘ra boshlagan. Xususan, Birlashgan Arab Amirliklari 18-avgust kuni Eron bilan barcha savdo-sotiq, tijoriy almashinuvlar va moliyaviy operatsiyalarni keyingi xabarga qadar to‘xtatishini e’lon qildi. BAA rasmiylari bu qarorni Tehron tomonidan mamlakat yo‘nalishida ikkita raketa uchirilgani haqidagi da’volar bilan izohladi. Amirliklar tomoniga ko‘ra, hujumdan ko‘zlangan maqsad dengiz qatnoviga tahdid solish bo‘lgan. Eron esa BAA tomonidan bildirilgan ushbu ayblovlarni rad etdi.