«Amerika mudofaaga tayyorlanmagan». AQSH bazalaridagi Eron zarbalari oqibatlari aks etgan suratlar eʼlon qilindi
Bu suratlar Pentagon nazorat organi oʻz hisobotida Amerikaning Yaqin Sharqdagi bazalarida yuzlab bino va inshootlar Eron zarbalari oqibatida shikastlangani va vayron boʻlganini maʼlum qilishi ortidan eʼlon qilindi.
«Amerika mudofaaga tayyorlanmagan». AQSH bazalariga Eron zarbalari oqibatlarini aks ettirgan suratlar e’lon qilindi
Amerikadagi CBS telekompaniyasi Eron zarbalaridan so‘ng AQSHning Yaqin Sharqdagi bir qator obyektlarida yuzaga kelgan vayrongarchilik miqyosini ko‘rsatadigan kadrlarni qo‘lga kiritdi.
Harbiy xizmatchilar taqdim etgan fotosuratlarda ikkiga bo‘linib ketgan radar samolyoti, yer bilan bitta bo‘lib ketgan treylerlar va jiddiy shikastlangan bino ko‘rinadi.
Sanasi ko‘rsatilmagan bu fotosuratlar AQSHning Saudiya Arabistoni va Kuvaytdagi bazalari hamda obyektlarida olingan.
Harbiy xizmatchilardan biri telekanalga anonim tarzda shunday degan: «Bu bazalarimizga yetkazilgan jiddiy shikastlanishlar va bu haqda Amerika jamoatchiligiga ma’lum qilinmagan. Biz u yerda [xuddiki] ko‘zlarimizni yumib turganmiz va yuzimizga zarbalar qabul qilib olganmiz».
Saudiya Arabistonidagi «Shahzoda Sulton» aviabazasida olingan suratda Boeing E-3 Sentry samolyoti ikkiga bo‘linib ketgani, uning dum qismi g‘ijimlanib, pachoqlangani ko‘rinadi.
Fotosuratlarda sana bo‘lmasa-da, shu yil martida xuddi shunday samolyot zarbaga uchrab, yo‘q qilingani tasdiqlangandi.
Boeing E-3 AWACS erta ogohlantirish samolyotlari uzoq masofadagi ehtimoliy nishonlarni aniqlash va kuzatish uchun ishlatiladi.
O‘shanda AQSH rasmiysi Reuters agentligiga Eronning aviabazaga uyushtirgan hujumi oqibatida 12 nafar amerikalik askar yaralangani, ulardan ikki nafarining ahvoli og‘ir ekanini bildirgandi.
Kuvaytdagi «Byuring» bazasida olingani taxmin qilinayotgan, sanasi ham ko‘rsatilmagan ikkita suratda esa vayron qilingan treylerlar hamda chodirga o‘xshash, tom qismi ilma-teshik bo‘lib ketgan va tutun ichida qolgan inshoot aks etgan.