22 yoshli talaba Minecraft o‘yinida butun Shveysariyani 1:1 masshtabda yaratdi
Bunday g‘oya 3D printer xarid qilinganidan so‘ng tug‘ilgan.
22 yoshli ETH talabasi Beda Gud Minecraft o‘yinida butun Shveysariyani 1:1 masshtabda yaratdi. U buning uchun Swisstopo topografik idorasining ochiq geoma’lumotlaridan foydalangan.
O‘yindagi har bir blok real hayotdagi bir metrga teng. Virtual makonning eng baland nuqtasi — Pennin Alp tog‘laridagi Dyufur cho‘qqisi — 4 634 blok balandlikka chiqadi, bu uning dengiz sathidan haqiqiy balandligiga mos keladi.
Loyiha 41 285 kvadrat kilometr maydonni qamrab oladi va tog‘lar, o‘rmonlar, suv havzalari, shaharlar hamda to‘g‘onlarni o‘z ichiga oladi. Milliardlab kubiklarni qo‘lda joylashtirishga ehtiyoj bo‘lmadi: muallif yozgan dastur ma’lumotlarni avtomatik ravishda o‘yinga ko‘chirdi.
Bunday g‘oya 3D printer xarid qilingach paydo bo‘lgan. Talaba Shveysariya binolari va landshaftlarini imkon qadar asl nusxaga yaqin qilib chop etishni rejalashtirgan edi, biroq oxir-oqibat bu ish butun mamlakatning keng ko‘lamli raqamli maketiga aylandi.
Dastlab bu faqat xobbi bo‘lsa-da, endi muallif o‘z ishini litsenziya sotish orqali monetizatsiya qilishni rejalashtirmoqda. Tushgan mablag‘lar xarajatlarni qoplash va loyihani yanada takomillashtirishga yo‘naltiriladi. Rejada ko‘llar va qoyalar grafikasini yaxshilash, shuningdek, kamchiliklarni bartaraf etish bor.
Natijani bepul ham ko‘rish mumkin: baland tog‘li Yungfrau-Alech mintaqasining 1,1 GB hajmdagi demoversiyasi ochiq foydalanishga joylashtirilgan. Uni ishga tushirish uchun dunyo balandligiga qo‘yilgan cheklovni olib tashlaydigan Cubic Chunks modi o‘rnatilgan Minecraft Java Edition 1.12.2 va kamida 16 gigabayt tezkor xotira kerak.
To‘liq versiyani hozircha faqat Shveysariya aholisi xarid qila oladi. Uning hajmi 24 GB bo‘lib, narxi 15 frank (220 ming so‘m)ni tashkil etadi.