“Tolibon” Nangarhor viloyatida 72 gektar yerni tortib oldi

“Tolibon” Nangarhor viloyatida 72 gektardan ortiq yerni musodara qildi

Afg‘onistonning “Tolibon” ma’muriyati Adliya vazirligi Nangarhor viloyatida 179 akr (72,4387 gektar) maydonni o‘z nazoratiga olganini e’lon qildi. Bu haqda Hasht-e Subh Daily nashri xabar berdi.

Vazirlik ushbu ma’lumotni 6-avgust kuni o‘zining Facebook sahifasida joylashtirdi. Xabarda aytilishicha, ushbu yer Nangarhor viloyatining Surx Rod tumanidagi Kashk hududida joylashgan.

“Tolibon”ning ta’kidlashicha, yerga oid hujjatlar Egallab olingan Amirlik yerlari bo‘yicha maxsus sud tomonidan ko‘rib chiqilgan. Qonuniy tartib-taomillardan so‘ng yer vazirlik tasarrufiga o‘tkazilgan.

Hokimiyatga qaytganidan beri “Tolibon” Afg‘oniston bo‘ylab ko‘plab yer maydonlari va turar joy hududlarini tortib oldi. Ular bu yerlar Islom Amirligiga tegishli ekanini da’vo qiladi. Biroq ko‘p holatlarda “Tolibon”ning egalik qilish haqidagi da’volari mahalliy aholi va yer egalari tomonidan e’tirozlarga sabab bo‘lmoqda.

Avvalroq ikki hafta ichida 100 mingdan ortiq afg‘onistonlik Eron va Pokistondan o‘z vataniga qaytib kelgani haqida xabar berilgandi.