Infantino Jahon chempionati huquqlarini sotish evaziga har bir davlatga 40 million dollardan taklif qildi

Jahon futbol federatsiyasi (FIFA) prezidenti Janni Infantino tashkilotga a'zo har bir mamlakatga 40 million dollar miqdorida moliyaviy yordam taklif qilmoqda. The Times nashrining xabar berishicha, bu taklif evaziga assotsiatsiyalar Jahon chempionati huquqlarining bir qismini xususiy investorlarga sotish bo‘yicha kelishuvga rozilik berishi kerak.

Infantino FIFAga a'zo barcha 211 ta davlat futbol assotsiatsiyalariga maxsus xat yuborib, ushbu masalada yakuniy qaror qabul qilish uchun 53 kun muddat bergan. Agar loyiha ko‘pchilik tomonidan ma'qullansa, 2027-yil 1-yanvardan boshlab umumiy qiymati 10 milliard dollarga teng bo‘lgan ulkan moliyaviy paket ishga tushadi. Bu mablag‘ turnir huquqlarini sotishdan tushgan daromad hisobiga shakllantiriladi va FIFA hamda a'zo davlatlar o‘rtasidagi hamkorlikning yangi bosqichini boshlab beradi.

FIFA rahbari o‘z maktubida yakuniy qaror assotsiatsiyalarga tegishli ekanligini alohida ta'kidlagan. Agar davlatlar investorlar bilan hamkorlik qilishni istamasa ham, moliyaviy yordamsiz qolmaydi: bunday holda FIFA o‘zining avvalgi moliyalashtirish dasturini saqlab qoladi va uning byudjetini qo‘shimcha 2,7 milliard dollarga oshiradi.

Shunga qaramay, bu tashabbusni hamma ham ijobiy qabul qilgani yo‘q. Jahon chempionati huquqlarini tashqi investorlarga berishga keskin qarshi bo‘lgan ayrim mutaxassislar va manbalar Infantinoning ushbu taklifini ochiqchasiga pora berishga urinish deb baholamoqda.